اسلام آباد،نائب وزیراعظم و وزیر خارجہ اسحاق ڈار آئندہ ماہ سرکاری دورے پر بنگلہ دیش جائیں گے، جو 2012 کے بعد کسی پاکستانی وزیر خارجہ کا بنگلہ دیش کا پہلا سرکاری دورہ ہوگا۔
اسحاق ڈار نے جمعرات کو اسلام آباد میں ایک پریس کانفرنس کے دوران اس دورے کا اعلان کرتے ہوئے کہا کہ یہ دورہ پاکستان اور بنگلہ دیش کے دوطرفہ تعلقات میں بہتری کے لیے ایک اہم قدم ثابت ہوگا۔ انہوں نے کہا کہ بنگلہ دیش پاکستان کا دیرینہ دوست اور برادر ملک ہے، اور دونوں ممالک تجارتی و اقتصادی تعاون پر توجہ مرکوز کرتے ہوئے ایک دوسرے کی مدد کرنے کے لیے مل کر کام کریں گے۔
اسحاق ڈار نے بتایا کہ انہیں یہ دورہ بنگلہ دیش کے چیف ایڈوائزر محمد یونس کی جانب سے دیا گیا تھا، جن سے ان کی حالیہ ملاقات قاہرہ میں ہوئی تھی۔ محمد یونس نے اسحاق ڈار کو ڈھاکہ کا دورہ کرنے کی دعوت دی، اور پاکستان نے اس دعوت کو قبول کیا۔ دونوں ممالک کے حکام کے درمیان بات چیت کے بعد دورے کی تاریخوں کا فیصلہ کیا جائے گا۔
واضح رہے کہ بنگلہ دیش کا دورہ کرنے والی آخری پاکستانی وزیر خارجہ حنا ربانی کھر تھیں، جو 2012 میں اس وقت کی وزیراعظم شیخ حسینہ واجد کو ڈی ایٹ سربراہی اجلاس میں مدعو کرنے کے لیے ڈھاکہ گئی تھیں۔
