لاہور۔نجی ایوی ایشن کمپنی اسکائی ونگز نے ایدھی فاؤنڈیشن کے تعاون سے پاکستان میں اپنی ایئر ایمبولینس سروس کے آغاز کا اعلان کیا ہے۔
یہ سروس پائپر سینیکا طیارے سے شروع کی جائے گی، جو مریضوں کو ملک کے کسی بھی ہوائی اڈے سے کراچی تک فوری طبی امداد کے لیے منتقل کرے گا۔ پرواز کے دوران مریضوں کی دیکھ بھال کے لیے ایک تجربہ کار طبی ٹیم بھی موجود ہوگی۔
پاکستان کی تاریخ میں پہلی بار ایئر ایمبولینس کے ذریعے مریضوں کی منتقلی
اسکائی ونگز ایوی ایشن کے سی ای او عمران اسلم خان نے کہا ہے کہ مستقبل میں دو مزید طیارے شامل کرکے اس سروس کو مزید وسعت دی جائے گی۔ ان کا کہنا تھا کہ کمپنی کا مقصد ملک بھر میں ایسے مریضوں کو فوری مدد فراہم کرنا ہے، جنہیں دور دراز یا شہری علاقوں سے بروقت طبی سہولیات تک پہنچانے کی ضرورت ہو۔ یہ اقدام پاکستان کے ہنگامی طبی نظام کو بہتر بنانے کی طرف ایک اہم قدم ہے۔
ایئر ایمبولینس سے دیگر خدمات
پارا چنار میں ایئر ایمبولینس کے ذریعے ادویات اور خوراک کی فراہمی بھی اس منصوبے کا حصہ ہے، جس سے دور دراز کے علاقوں میں رہنے والوں کو اہم سہولیات پہنچائی جا سکیں گی۔
پنجاب حکومت کا بھی ایئر ایمبولینس کا آغاز
اس کے علاوہ، وزیر اعلیٰ پنجاب مریم نواز نے بھی صوبائی حکومت کے تحت ایئر ایمبولینس سروس کا آغاز کیا ہے۔ اس سروس کے تحت ایک زخمی خاتون کو کامیابی سے میانوالی سے راولپنڈی منتقل کیا گیا۔
