اسلام آباد۔وفاقی وزیر داخلہ محسن نقوی نے اس بات کی وضاحت کی ہے کہ انہوں نے امریکا میں کسی بھی چین مخالف تقریب میں شرکت نہیں کی۔ ان کے مطابق مخالفین کی جانب سے جھوٹا پروپیگنڈا کیا جا رہا ہے جس کا حقیقت سے کوئی تعلق نہیں۔
ہیوسٹن میں میڈیا سے گفتگو کرتے ہوئے محسن نقوی نے کہا کہ نوجوانوں کی ایک تقریب میں ان کی شرکت کو غلط رنگ دیا جا رہا ہے، لیکن وہ کسی بھی چین مخالف تقریب میں شامل نہیں ہوئے۔ انہوں نے مزید کہا کہ اس قسم کے پروپیگنڈے کا ان پر کوئی اثر نہیں ہوگا۔
وزیر داخلہ نے بتایا کہ ان کے امریکا کے دورے کا بنیادی مقصد دہشت گردی کے خلاف ایک مؤثر حکمت عملی تیار کرنا ہے۔ انہوں نے زور دیا کہ دہشت گردی ایک عالمی مسئلہ ہے اور اس کے خاتمے کے لیے تمام ممالک کو مل کر کام کرنا ہوگا۔ پاکستان کے خلاف ہتھیار اٹھانے والوں کے ساتھ سختی سے نمٹا جائے گا۔
محسن نقوی نے اپنے دورے کو سیاسی ملاقاتوں پر مبنی قرار دیتے ہوئے کہا کہ ان کا مقصد دہشت گردی کے خلاف مشترکہ منصوبہ بندی کرنا ہے۔ انہوں نے اس بات پر تشویش کا اظہار کیا کہ امریکا کے ایوانِ نمائندگان کو پاکستان کے خلاف اکسایا جا رہا ہے، لیکن سیاست کو اس حد تک نہیں جانا چاہیے کہ ملک کو نقصان ہو۔
کانگریس کے اراکین کے ساتھ ملاقاتوں کو مثبت قرار دیتے ہوئے محسن نقوی نے کہا کہ دونوں ممالک کے تعلقات کو مضبوط کرنے کے لیے مختلف امور پر بات چیت ہوئی۔ انہوں نے عالمی برادری سے پاکستان کے مسائل کے حل کے لیے تعاون کی اہمیت پر زور دیا۔
