اسلام آباد(نیوز رپورٹر )وزیرِ اعظم کی معاون برائے موسمیاتی تبدیلی رومینہ خورشید عالم نے ترقی پذیر ممالک، خاص طور پر افریقی ایشیائی دیہی ترقیاتی تنظیم (AARDO) کے ارکان کو درپیش موسمیاتی چیلنجز پر روشنی ڈالی، پیر کے روز “آفات کے انتظام اور موسمیاتی تبدیلی کے لیے تطابق” پر ہونے والے تربیتی پروگرام سے خطاب کرتے ہوئے انہوں نے کہا کہ محدود مالی وسائل اور ناکافی بنیادی ڈھانچہ موسمیاتی تبدیلی کے اثرات کو بڑھا دیتے ہیں، اور فوری عالمی تعاون اور پائیدار موسمیاتی حل اپنانے کی ضرورت پر زور دیا، اپنے خطاب میں رومینہ خورشید عالم نے کہا کہ موسمیاتی تبدیلی ایک سنگین عالمی مسئلہ ہے، خاص طور پر AARDO کے ممالک کے لیے جو مختلف ماحولیاتی خطرات کا سامنا کر رہے ہیں جو ان کے قدرتی وسائل اور سماجی و اقتصادی استحکام کو نقصان پہنچا رہے ہیں۔ پاکستان اور بنگلہ دیش جیسے ممالک خاص طور پر گلیشیئر کے پگھلاؤ اور بدلتے ہوئے مون سون پیٹرن کی وجہ سے سیلابوں کا شکار ہیں۔ جبکہ کینیا اور زیمبیا شدید خشک سالی کا سامنا کر رہے ہیں، جو زراعت اور پانی کی فراہمی پر سنگین اثرات مرتب کر رہی ہے۔ ملائیشیا اور عمان کو سمندری سطح میں اضافے کا سامنا ہے جو ساحلی کمیونٹیز اور بنیادی ڈھانچے کو خطرے میں ڈال رہا ہے۔
“پانی کی کمی ان ممالک میں ایک مستقل چیلنج ہے۔ اردن، فلسطین اور نامیبیا دنیا کے سب سے زیادہ پانی کی کمی کا شکار ممالک میں شامل ہیں، جس سے پینے کے صاف پانی اور زرعی آبپاشی تک رسائی کے حوالے سے سنگین خدشات جنم لے رہے ہیں۔ اسی طرح شام اور گھانا جیسے ممالک مٹی کی خرابی کا سامنا کر رہے ہیں، جو غذائی تحفظ کے خطرات کو مزید بڑھا رہا ہے، انہوں نے مزید کہا کہ ترقی پذیر ممالک پہلے ہی درجہ حرارت میں اضافے، غیر متوقع بارشوں اور خشک سالی، سیلابوں اور طوفانوں جیسے شدید موسمی واقعات کا سامنا کر رہے ہیں۔ ان چیلنجز سے نمٹنے کے لیے رومینہ خورشید عالم نے موسمیاتی تبدیلی سے مؤثر طریقے سے نمٹنے کے لیے فوری طور پر علاقائی تعاون کی ضرورت پر زور دیا، پروگرام کے حوالے سے بات کرتے ہوئے، جو 9 جنوری کو شروع ہوا تھا اور جو آفات کے انتظام اور موسمیاتی تبدیلی کے لیے تطابق کے حوالے سے ایک ہفتہ طویل تربیتی پروگرام تھا، اس کا انعقاد اختر حمید خان نیشنل سینٹر فار رورل ڈویلپمنٹ (AHKNCRD) نے AARDO کے ساتھ مل کر کیا۔ رومینہ خورشید عالم نے یقین ظاہر کیا کہ یہ تربیت شرکاء کو اپنے ممالک میں مؤثر آفات کے انتظام اور موسمیاتی تبدیلی کے لیے تطابق کی حکمت عملیوں کو نافذ کرنے کے لیے ضروری علم اور مہارت فراہم کرے گی۔ انہوں نے AARDO کے رکن ممالک کی مدد کے لیے علم کے تبادلے، صلاحیت سازی اور پائیدار ترقی کے لیے انقلابی حلوں کی ترویج کی اہمیت پر بھی زور دیا۔
رومینہ خورشید نے پاکستان اور دیگر AARDO رکن ممالک میں دیہی ترقی اور غربت کے خاتمے کے لیے NCRD کی کوششوں کی سراہنا کی اور اس کے AARDO کے ساتھ تعاون پر اظہار اطمینان کیا، اسلام آباد میں واقع AHKNCRD ایک صلاحیت سازی کا حکومتی ادارہ ہے جو AARDO کے ساتھ کام کرتا ہے، جو ایشیا اور افریقہ کے 32 رکن ممالک پر مشتمل ایک بین الحکومتی تنظیم ہے، رومینہ خورشید نے مزید کہا کہ پاکستان موسمیاتی تبدیلی کے اثرات کا بڑھتا ہوا شکار ہے، اور اس کے ساتھ ساتھ جامع آفات کے انتظام کی حکمت عملیوں اور تعاون پر مبنی تطابق کے اقدامات کی فوری ضرورت ہے تاکہ لچک پیدا کی جا سکے۔ انہوں نے آفات کے انتظام اور موسمیاتی تبدیلی کے لیے تطابق کے پیچیدہ چیلنجز سے نمٹنے کے لیے اسٹیک ہولڈرز کو درکار علم سے لیس کرنے کی اہمیت کو دوبارہ اجاگر کیا، یہ تربیتی پروگرام ایک ہفتے تک جاری رہے گا جس میں AARDO کے 13 رکن ممالک کے شرکاء شرکت کر رہے ہیں، جن میں پاکستان، بنگلہ دیش، گیمبیا، گھانا، اردن، کینیا، ملائیشیا، نامیبیا، عمان، فلسطین، سری لنکا، شام اور زیمبیا شامل ہیں.
