لاہور۔پاکستان مسلم لیگ (ن) کے صدر اور سابق وزیراعظم نواز شریف نے کہا کہ وقت نے ثابت کیا ہے کہ ان کے مخالفین کے پاس سوائے بغض، حسد، گالی گلوچ، بدتمیزی اور بے ادبی کے کچھ نہیں ہے۔
نواز شریف اور وزیراعلی پنجاب مریم نواز شریف سے پنجاب اسمبلی کے ارکان نے ملاقات کی، جن میں بہاولپور، رحیم یار خان، مظفرگڑھ، لیہ، ڈی جی خان، اور راجن پور ڈویڑن سے تعلق رکھنے والے ارکان شامل تھے۔
نواز شریف نے ارکان اسمبلی سے بات کرتے ہوئے کہا کہ اللہ کی مہربانی سے حالات بہتر ہو رہے ہیں، اور معیشت میں بہتری آ رہی ہے، پالیسی ریٹ میں کمی نے کاروباری برادری کا اعتماد بڑھایا ہے، اور سخت معاشی حالات کے بعد مہنگائی میں کمی واقع ہوئی ہے، جس سے عوام کو مزید ریلیف ملنے کی امید ہے۔
انہوں نے مزید کہا کہ الحمدللہ، تعمیراتی سرگرمیاں دوبارہ شروع ہو چکی ہیں، اور عالمی مالیاتی ادارے بھی شہباز شریف کی محنت اور جدوجہد کا اعتراف کر رہے ہیں۔ وقت نے یہ بھی ثابت کر دیا کہ مخالفین کے پاس سوائے بغض، حسد اور گالی گلوچ کے کچھ نہیں ہے۔
نواز شریف نے کہا کہ سیاست، دفاع اور ترقی کے میدان میں ہمارے ملک اور قوم کی خدمات کا ریکارڈ شاندار ہے۔ اگر ترقی کا تسلسل جاری رہتا، تو آج ملک اور قوم خطے اور دنیا میں کہیں آگے ہوتے، اور عوام کو مشکلات کا سامنا نہ کرنا پڑتا۔
اس موقع پر ارکان نے گفتگو کرتے ہوئے کہا کہ جب سب ناامید ہو گئے تھے، نواز شریف نے ہمیشہ ملک اور قوم کو نئی امید دی۔ نواز شریف اور شہباز شریف نے سیاست کو ریاست پر فوقیت دے کر حب الوطنی کی ایک عظیم مثال قائم کی۔ ایک بار پھر قوم نے دیکھ لیا کہ صرف مسلم لیگ (ن) ہی عوام کو ریلیف فراہم کرتی ہے۔
وزیراعلی پنجاب مریم نواز نے کہا کہ قیادت، پارٹی اور پنجاب کے عوام کا اعتماد ایک بڑی ذمہ داری ہے، اور نواز شریف اور شہباز شریف کی عوامی خدمت کا معیار پورا کرنا آسان نہیں۔
اجلاس میں عوامی فلاحی منصوبوں اور مستقبل کی سیاسی حکمت عملی پر مشاورت بھی ہوئی، جس میں پارٹی کے سینئر رہنما سینیٹر پرویز رشید، رانا ثنائ اللہ، پنجاب کی سینئر وزیر مریم اورنگزیب اور راشد نصر اللہ بھی موجود تھے۔
پنجاب اسمبلی کے ڈپٹی اسپیکر ملک ظہیر اقبال چنڑ، صوبائی وزیر آبپاشی محمد کاظم پیرزادہ، چوہدری خالد محمود جگا، صاحبزادہ ایم غازین عباسی، ملک خالد محمود وارن، میاں محمد شعیب اویسی، چوہدری محمود احمد، محمد اجمل خان چانڈیا، عون حمید ڈوگر، سبطین رضا بخاری اور نواب خان گوپانگ ملاقات کرنے والوں میں شامل تھے۔
اس کے علاوہ، صوبائی وزیر معدنیات شیر علی گورچانی، غلام اصغر خان گورمانی، صالح الدین خان کھوسہ، حنیف خان پتافی، محمد قادر خان لغاری، سردار علی احمد خان لغاری، محمد احمد خان لغاری، شیر افغان گورچانی، پرویز اقبال گورچانی، عبدالعزیز خان دریشک اور خضر حسین مزاری بھی ملاقات میں شریک تھے۔
