اسلام آباد(کور ٹ رپورٹر)اسلام آباد ہائی کورٹ کے جسٹس بابر ستار کی عدالت نے ڈیڑھ ارب روپے سے زائد کے مبینہ سیلز ٹیکس چوری سے متعلق کیس میں ایف بی آر کی جعلی رسیدیں جمع کرانے پرسینٹر طلحہ محمود کی کمپنی M/S Pakistan Accumulators Pvt . Limited versus Federation of Pakistan & others کے خلاف کارروائی کی استدعا پر فریقین کو نوٹسز جاری کرتے ہوئے دو دن میں جواب طلب کر لیا۔
گذشتہ روزمتفرق درخواست کی سماعت کے دوران ایف بی آر نے الزام عائد کیا کہ نجی کمپنی ایم/ایس پاکستان اکیمولیٹرز پرائیویٹ لمیٹڈ نے عدالت میں جعلی دستاویزات جمع کرائیں ، ایف بی آر کی جانب سے وکلاءبیرسٹر عمر اعجاز گیلانی اور علی قریشی عدالت پیش ہوئے ، بیرسٹرعمر گیلانی نے کہا کہ ایک کروڑ 70 لاکھ کلوگرام سیسہ مبینہ طور پر کراچی سے حطار لایا گیا .
تحقیقات سے پتہ لگا کہ آمد و رفت کی ساری رسیدیں جعلی ہیں جس گاڑی پر مبینہ طور پر 46,000 کلو سیسہ لایا گیا وہ سوزوکی ایف ایکس ہے ، نجی کمپنی ایم/ایس پاکستان اکیمولیٹرز پرائیویٹ لمیٹڈ نے عدالت کی آنکھوں میں دھول جھونک رہی ہے ، عدالت میں جعلی رسیدیں جمع کرنا تعزیراتِ پاکستان کے تحت جرم ہے اور سزا سات سال ہے ، عدالت نے فریقین کو نوٹسز جاری کرتے ہوئے سماعت 11 مارچ تک ملتوی کر دی.
