اسلام آباد(سپیشل رپورٹر )فیڈرل گورنمنٹ ایمپلائیز ہاؤسنگ فاؤنڈیشن پارک روڈ ہاؤسنگ پراجیکٹ میں کروڑوں روپے کی کرپشن کرنے کے الزام میں جعلی پنگ گارنٹی دینے پر ہاؤسنگ فاؤنڈیشن کے پراجیکٹ ڈائریکٹر فائنانس ڈائریکٹر سمیت چھ ملزمان کے خلاف درج مقدمہ کے بعد یوبی ایل کوئٹہ کے دو ملوث اعلیٰ بنک افسران کو گرفتار کرلیاتھا۔گرفتار ملزمان نے دوران تفتیش اہم حقائق سے پردہ اٹھادیا۔ذرائع نے انکشاف کیا کہ ملزمان نے دوران تفتیش بتایا کہ کمپنی کے مالک رب نواز بگٹی نے دباؤ ڈال کر ملی بھگت سے جعلی گارنٹی چیک بنوایا اور وہ واقعی جعلی ہے ۔
ملزمان سے تفتیش کے بعد ایف آئی اے حکام نے تحقیقات کا دائرہ وسیع کرتے ہوئے دیگر ملزمان جو عبوری ضمانت پر ہیں عدالتوں سے انکی ضمانت منسوخی کیلئے حکمت عملی تیار کرلی ہے ۔پروجیکٹ ڈائریکٹر شیخ غلام فرید اور ڈائریکٹر فنانس محمد کاشف سمیت دیگر کیخلاف گھیرا تنگ کردیا گیا ہے ۔گرفتار بنک افسران یوبی ایک کوئٹہ کے بنک منیجر صغیر احمد بلوچ اور محمد شیراز کو جوڈیشل مجسٹریٹ اسلام آباد کی عدالت میں پیش کیا ۔عدالت نے دونوں ملزمان کو 14روزہ جوڈیشل ریمانڈ پر اڈیالہ جیل روانہ کردیا۔یاد رہے کہ مرکزی ملزمان جن میں پروجیکٹ ڈائریکٹر غلام فرید،ٹھیکیدار کمپنی ایچ آر کے مالک رب نواز بگٹی،فنانس ڈائریکٹر محمد کاشف نے ملی بھگت سے 71کروڑ روپے کی جعلی بنک گارنٹی پر ادائیگی کی گئی تھی اور،مرکزی ملزمان نے عدالت سے عبوری ضمانت حاصل کررکھی ہے
