اسلام آباد (نیوز رپورٹر)قومی احتساب بیورو اسلام آباد میں رہائشی منصوبوں میں غبن کے متاثرین میں رقوم کی واپسی کی تقریب، تقریب میں الحرم سٹی، غوری ٹاون، گلشن رحمان اور ارائین سٹی کے 500 سے زائد متاثرین میں 300 ملین روپئے کے چیک تقسیم کیے گئے ، چیئرمین نیب وقار احمد چوھان نے کہا شہریوں کی لوٹی گئی رقوم کی فوری طور پر واپسی نیب کی اولین ترجیح ہے ، ایسے عناصر کے خلاف سخت ترین قانونی کاروائی عمل میں لائی جا رہی ہے جو بدعنوانیوں میں ملوث ہیں شہری چھان بین اور تسلی کے بعد اپنی محنت اور خون پسینے کی کمائی کی سرمایہ کاری کریں .
انہوں نے مزید کہا کہ شہریوں کے لوٹے گئے سرمائے کی بازیابی میں نیب افسران کی کارکردگی قابل ستائش ہے نیب ،قانونی طریقے سے شہریوں کو لوٹنے والوں کے خلاف ایکشن لے رہا ہے – نیب نہ صرف پاکستان بلکہ بیرون ملک بھاگنے والے ان ملزمان کو گرفت میں لے گا ، نیب ان ملزمان کے شناختی کارڈ اور پاسپورٹ بھی بلاک کرائے گا۔نیب ملزمان کی جائیدادوں کو بھی قانونی طریقے سے ضبط کرا کر نیلام کرائے گا ، مطلوب ملزمان کےخلاف منی لانڈرنگ کے تحت تفتیش کرکے کاروائی کی جائے گی ، نیب وہ تمام قانونی اقدامات لے گاجس سے عام شہریوں ، بیواوں اور پینشنرز کی زندگی بھر کی جمع پونجی لوٹنے والوں کو قانون کے کٹہرے میں کھڑا کیا جاسکے۔
