اسلام آباد(سٹاف رپورٹر)آئل اینڈ گیس ڈیولپمنٹ کمپنی لمیٹڈ (او جی ڈی سی ایل) کے چیئرمین ظفر مسعود کی کتاب”سیٹ 1C: امید، حوصلے اور تجدیدِ نو کی ایک زندہ بچ جانے والے کی کہانی“ کی تقریبِ رونمائی اسلام آباد پالیسی ریسرچ انسٹیٹیوٹ (آئی پی آر آئی) کے زیرِ اہتمام منعقد ہوئی۔ تقریب کا افتتاح آئی پی آر آئی کے صدر لیفٹیننٹ جنرل (ریٹائرڈ) مجید احسان نے کیا۔ یہ کتاب ظفر مسعود کے پانچ سال پہلے پیش آنے والے طیارہ حادثے میں معجزانہ طور پر بچنے کی کہانی بیان کرتی ہے، اور زندگی، صدمے اور بحالی کے بارے میں ان کے ذاتی خیالات پر مبنی ہے۔
تقریب سے خطاب کرتے ہوئے ظفر مسعود نے کہا کہ”اگرچہ یہ کتاب پہلے پہل انہوں نے اپنے لیے لکھی، تاہم اس میں موجود اسباق ہر فرد کے لیے فائدہ مند ہو سکتے ہیں۔ کتاب میں ذہنی صحت، روایت، ہمت اور زندہ بچ جانے والے کے احساسِ جیسے وسیع موضوعات پر بھی روشنی ڈالی گئی ہے۔“ بطور مصنف اور مہمانِ خصوصی، ظفر مسعود نے زندگی کی اہمیت اور موت سے پہلے کے لمحات کے بارے میں اپنے خیالات اور تجربات بیان کیے۔ ان کے مطابق کتاب کا آغاز حادثے سے 30 سیکنڈ پہلے کے لمحات سے ہوتا ہے، جنہیں وہ خود احتسابی اور سچائی کا وقت قرار دیتے ہیں۔ انہوں نے کہا کہ، ”ان 30 سیکنڈز میں انسان خود کو جوابدہ ہوتا ہے۔ جس طرح آپ نے زندگی گزاری ہوتی ہے، انہی لمحوں میں وہ سب آپ کے سامنے آ جاتا ہے۔“
تقریب میں ایک پینل گفتگو بھی منعقد ہوئی جس میں مصنف ظفر مسعود، مدیرہ سیدہ آمنہ حسن، اور ماہر تعلیم ڈاکٹر خرم الٰہی خان شامل تھے، جبکہ میزبانی محمد شعیب نے کی۔ تقریب میں سفارت کاروں، ماہرین تعلیم، سول سوسائٹی کے نمائندوں اور صحافیوں نے شرکت کی۔ شرکاء نے کتاب کو ایک گہرائی سے بھرپور، انسان دوست اور غور و فکر پر مبنی یادداشت قرار دیا۔’سیٹ 1C‘صرف ایک بقاء کی کہانی نہیں، بلکہ زندگی کی ناپائیداری اور اندرونی طاقت پر ایک گہرا فکری اظہار ہے۔
