اسلام آباد (سٹاف رپورٹر)نائب وزیر اعظم اسحاق ڈار نے فرانس کے وزیر برائے یورپ و خارجہ امور جین نول بیروٹ سے ٹیلی فونک گفتگو کی۔ دفتر خارجہ کے مطابق نائب وزیراعظم نے فرانسیسی وزیر خارجہ کو اس بات سے آگاہ کیا کہ پاکستان نے اس بحران کے دوران تحمل کا مظاہرہ کیا اور اقوام متحدہ کے چارٹر اور بین الاقوامی قانون کے مطابق صرف اپنے دفاع کا حق استعمال کیا۔
انہوں نے کہا کہ پاکستان علاقائی امن و سلامتی کے لیے ذمہ دارانہ انداز میں کام جاری رکھے گا۔ فرانس کے وزیر خارجہ نے معصوم جانوں کے ضیاع پر تعزیت کا اظہار کیا۔ پاکستان اور بھارت کے درمیان جنگ بندی مفاہمت کا خیرمقدم کرتے ہوئے انہوں نے دونوں فریقوں کو تحمل سے کام لینے کی ضرورت پر زور دیا۔ دونوں رہنمائوں نے کثیرالجہتی فورمز سمیت قریبی رابطہ برقرار رکھنے پر اتفاق کیا۔
