اسلام آباد (نیوز رپورٹر) وفاقی وزیر برائے ریلوے محمد حنیف عباسی نے آج پاکستان میں سوئس سفیر جورج اسٹینر سے اہم ملاقات کی۔ ملاقات میں دونوں فریقوں کے درمیان باہمی امور پر تبادلہ خیال کیا گیا۔ وزیر ریلوے محمد حنیف عباسی نے سوئٹزرلینڈ کے عالمی امن اور انسانیت کی حمایت میں کردار کو سراہا اور اس اہم تعاون پر اظہار تشکر کیا۔
اس موقع پر سوئس سفیر نے وزیر ریلوے محمد حنیف عباسی کو پاکستان ریلوے کا چارج سنبھالنے پر مبارکباد دی اور اس بات پر زور دیا کہ پاکستان ریلوے کو جدید اور بہتر بنانے کے لیے وزیر ریلوے کی کوششوں کو سراہا۔ملاقات میں پاکستان اور سوئٹزرلینڈ کے درمیان ریلوے کے شعبے میں تعاون کے نئے امکانات پر بات چیت کی گئی اور دونوں ممالک کے درمیان تجارت، سیاحت اور ریلوے کے شعبے میں مزید تعاون پر اتفاق کیا گیا۔
وزیر ریلوے حنیف عباسی نے سوئس سفیر کو پاکستان کے تاریخی ریلوے اسٹیشنز، خاص طور پر گولڑہ کا دورہ کرنے کی دعوت دی۔
یہ ملاقات دونوں ممالک کے درمیان تعلقات کو مزید مستحکم کرنے کی سمت میں ایک اہم قدم ہے اور اس سے پاکستان اور سوئٹزرلینڈ کے درمیان ریلوے کے شعبے میں تعاون کو مزید تقویت ملے گی.
