اسلام آباد (سٹاف رپورٹر)وزارت ریلوے میں ایک اہم اجلاس منعقد ہوا جس میں آل پاکستان ریلوے ڈویژن کا مکینیکل اسٹاف بھرپور شرکت کے ساتھ حاضر تھا۔ اجلاس کا مرکزی موضوع موسم گرما کے دوران لوکوموٹو کی خرابی، کوچز میں اے سی کی ناکامی اور دیگر تکنیکی مسائل کو فوری اور مؤثر طریقے سے حل کرنا تھا تاکہ ریلوے کے سفر کو مسافروں کے لیے آرام دہ، محفوظ اور بروقت بنایا جا سکے۔ریلوے وزیر حنیف عباسی نے اجلاس میں واضح کیا کہ موسم گرما کے دوران پیش آنے والی لوکوموٹو فیلئرز اور کوچز میں اے سی کی خرابیوں کو روکنا وزارت کی اولین ترجیحات میں شامل ہے۔ انہوں نے ہدایت دی کہ اس مقصد کے لیے تمام دستیاب وسائل بروئے کار لائے جائیں اور متعلقہ اسٹاف اور عملہ اپنی ذمہ داریوں کو سنجیدگی سے ادا کرے تاکہ ریلوے کا نظام مستحکم اور فعال بنایا جا سکے۔
وزیر نے مسافروں کے آرام اور بروقت سفر کو یقینی بنانے پر خاص زور دیا اور کہا کہ کسی بھی قسم کی تکلیف یا تاخیر کو ہرگز برداشت نہیں کیا جائے گا۔ انہوں نے تمام اسٹاف، ڈپٹی سپرنٹنڈنٹ اور متعلقہ اہلکاروں کو سخت ہدایات جاری کیں کہ وہ ریلوے کی خدمات کی بہتری کے لیے فوری اور مؤثر اقدامات کریں۔مزید برآں، وزیر حنیف عباسی نے کہا کہ اگر کسی بھی شعبے میں غفلت برتی گئی یا خامیوں کی اصلاح نہ کی گئی تو اس کے خلاف سخت قانونی اور انتظامی کارروائی عمل میں لائی جائے گی۔ انہوں نے عملے کی کارکردگی پر سخت نظر رکھنے کا حکم دیا تاکہ ریلوے سروس کو جدید اور مسافروں کے لیے زیادہ قابل اعتماد بنایا جا سکے۔وزیر کا کہنا تھا کہ ریلوے کا معیار بلند کرنا اور مسافروں کو بہترین خدمات فراہم کرنا وزارت کی اولین ترجیح ہے۔ سفر کے دوران کسی بھی قسم کی رکاوٹ یا تاخیر ناقابل قبول ہے اور اس کی روک تھام کے لیے خصوصی نگرانی کی جائے گی۔
آخری میں وزیر نے کہا کہ ریلوے کے معیار کو بہتر بنانے کے لیے ہر ممکن تعاون فراہم کیا جائے گا تاکہ پاکستان کی ریلوے سروس عالمی معیار کی حامل ہو اور ملک بھر کے شہریوں کو ایک محفوظ، آرام دہ اور بروقت سفری سہولت میسر ہو.
