اسلام آباد(سٹاف رپورٹر )وفاقی وزیر ریلوے محمد حنیف عباسی کی زیر صدارت پاکستان ریلویز اور الائیڈ بینک لمیٹڈ (ABL) کے درمیان مفاہمتی یادداشت (MoU) پر دستخط کی ایک اہم تقریب اسلام آباد میں منعقد ہوئی۔ اس معاہدے کے تحت پاکستان ریلویز کے 348 ریلوے اسٹیشنوں پر جدید پوائنٹ آف سیل (POS) سسٹمز نصب کیے جائیں گے، جن کا مقصد ٹکٹنگ، ادائیگی اور مالیاتی امور کو جدید، شفاف اور خودکار بنانا ہے ، تقریب سے خطاب کرتے ہوئے وفاقی وزیر ریلوے محمد حنیف عباسی نے کہا کہ “ہم وزیرِاعظم کے ڈیجیٹل پاکستان وژن کے مطابق پاکستان ریلوے کو مکمل طور پر ڈیجیٹلائز کرنے جا رہے ہیں۔ اے بی ایل بینک اور پاکستان ریلویز ایک ٹیم کی طرح مل کر کام کر رہے ہیں اور ہمارا ہدف پاکستان کو ایک جدید، خودمختار اور ترقی یافتہ ریاست بنانا ہے۔ یہ منصوبہ آئندہ 60 دنوں میں مکمل کیا جائے گا اور ہم اسے پوری سنجیدگی اور لگن سے پایۂ تکمیل تک پہنچائیں گے۔”
انہوں نے کہا کہ اب مسافر کریڈٹ یا ڈیبٹ کارڈ کے ذریعے نہ صرف ٹکٹ خرید سکیں گے بلکہ دیگر ریلوے خدمات کی بھی آسانی سے ادائیگی کر سکیں گے، جس سے نقدی پر انحصار کم ہو جائے گا۔ POS سسٹمز کی بدولت قطاروں اور دستی کام میں کمی آئے گی اور تجارتی لین دین تیز تر اور مؤثر ہو گا ، وفاقی وزیر نے اس بات پر زور دیا کہ ریلوے آمدنی کی اصل وقت میں نگرانی ممکن ہو سکے گی، جو شفافیت اور جوابدہی کے فروغ میں اہم سنگِ میل ہے۔ اس کے ساتھ ہی، POS سسٹمز کی بدولت مالی دھوکہ دہی، چوری اور حساب کتاب کی غلطیوں کے امکانات بھی نمایاں طور پر کم ہوں گے ، انہوں نے کہا کہ ABL کی مرچنٹ سروسز کے تحت ریلوے اسٹیشنوں پر موجود فوڈ اسٹالز، کیوسکس اور دیگر چھوٹے دکاندار بھی ڈیجیٹل ادائیگیوں کو قبول کر سکیں گے، جس سے چھوٹے کاروبار رسمی مالی نظام میں شامل ہوں گے اور انہیں بینکنگ سہولیات تک رسائی حاصل ہو گی۔ یہ اقدام مالی شمولیت کے فروغ، کیش لیس معیشت کی ترویج اور نچلی سطح پر ڈیجیٹل کلچر کو فروغ دینے کی جانب ایک مؤثر قدم ہے۔
معاہدے پر دستخط پاکستان ریلویز کی جانب سے ڈائریکٹر آئی ٹی، جناب علی رضا اور الائیڈ بینک کی جانب سے فرخ زیب خان (یونٹ ہیڈ ڈیجیٹل بینکنگ) نے کیے ، تقریب میں پاکستان ریلویز کی اعلیٰ قیادت نے شرکت کی، جن میں چیئرمین پاکستان ریلویز سید مظہر علی شاہ، چیف ایگزیکٹو آفیسر (CEO) عامر بلوچ، اور ڈی ایس راولپنڈی نورالدین شامل تھے، جبکہ تمام ڈویژنل سپرنٹنڈنٹس (DSs) ویڈیو لنک کے ذریعے آن لائن شریک تھے ، الائیڈ بینک کی نمائندگی کرتے ہوئے فیصل رشید غوری (گروپ ہیڈ بینکنگ سروسز)، سجاد حسین (گروپ ہیڈ بزنس) اور فرخ زیب خان (یونٹ ہیڈ ڈیجیٹل بینکنگ) نے تقریب میں شرکت کی.
