اسلام آباد ( سٹاف رپورٹر)وفاقی وزیر برائے موسمیاتی تبدیلی و ماحولیاتی ہم آہنگی، ڈاکٹر مصدق ملک نے سیویل، اسپین میں منعقدہ ایک اعلیٰ سطحی پینل نشست میں شرکت کی جس کا عنوان “بینک ایبل پاکستان: اثر انگیز سرمایہ کاری اور معاشی تبدیلی کے لیے سبز مالیاتی حل” تھا۔
وزیر مملکت برائے موسمیاتی تبدیلی و ماحولیاتی ہم آہنگی، محترمہ شذرہ منصب علی خان بھی اس موقع پر موجود تھیں۔مذاکرے کے دوران پاکستان میں سبز منصوبوں کے لیے اثر انگیز حل اور سرمایہ کاری کے مواقع کی اہمیت پر توجہ مرکوز کی گئی۔ شرکاء نے اس بات کا جائزہ لیا کہ یہ اقدامات کس طرح ملک کی اقتصادی تبدیلی میں معاون ثابت ہو سکتے ہیں۔
ڈاکٹر مصدق ملک نے سبز مالیاتی طریقہ کار کو فروغ دینے کی ضرورت پر زور دیا اور موسمیاتی مطابقت رکھنے والی سرمایہ کاری کو پاکستان کی پائیدار ترقی کے لیے ایک مؤثر ذریعہ قرار دیا.
