اسلام آباد(سٹاف رپورٹر )وائس چانسلر علامہ اقبال اوپن یونیورسٹی پروفیسر ڈاکٹر ناصر محمود نے کہا ہے کہ علامہ اقبال اوپن یونیورسٹی ملک کا وہ واحد تعلیمی ادارہ ہے جس نے بین الاقوامی سطح پر اپنی علمی خدمات اور جدید فاصلاتی تعلیم کے ماڈل کے باعث ایک نمایاں مقام حاصل کرلیاہے۔
بدھ کو یہاں جاری اپنے ایک بیان میں انہوں نے کہا کہ ہمیں یہ اعزاز حاصل ہے کہ گذشتہ سمسٹر میں دنیا کے 37 ممالک سے بین الاقوامی طلبہ نے ہمارے تعلیمی پروگرامز میں داخلہ لیا جو نہ صرف ہمارے تعلیمی معیار پر اعتماد کا مظہر ہے بلکہ پاکستان کے لئے عالمی سطح پر نیک نامی کا باعث بھی ہے۔سمسٹر خزاں 2025ء کے لئے بین الاقوامی طلبہ کو پیش کئے جانے والے نئے تعلیمی پروگراموں پر اظہار خیال کرتے ہوئے انہوں نے کہا کہ ہماری کوشش ہے کہ علم کی روشنی کو سرحدوں سے آزاد کر کے دنیا کے ہر کونے تک پہنچایا جائے، اوپن یونیورسٹی تعلیم کا وہ دروازہ ہے جو دنیا کے ہر طالب علم کے لئے کھلا ہے۔
ڈاکٹر ناصر محمود نے مزید کہا کہ یونیورسٹی نہ صرف تعلیم کے دروازے ہر خاص و عام کے لئے کھولے ہوئے ہے بلکہ جدید ٹیکنالوجی اور بین الاقوامی تعلیمی معیارات کو مدِنظر رکھتے ہوئے ایسے پروگرامز پیش کئے جا رہے ہیں جو دنیا بھر کے طلبہ کی تعلیمی و پیشہ وارانہ ضروریات کو پورا کریں،دنیا بھر میں رہنے والے انٹرنیشنل طلبہ میٹرک، انٹرمیڈیٹ، ایسوسی ایٹ ڈگری، بی ایس، بی ایڈ اور پوسٹ گریجویٹ ڈپلومہ پروگرامز میں داخلہ لے سکتے ہیں۔
یہ پروگرامز آن لائن مینجمنٹ سسٹم کے تحت پیش کئے گئے ہیں جس میں طلبہ اپنی اسائنمنٹس آن لائن جمع کرائیں گے اور امتحانات بھی آن لائن سسٹم کے تحت ہوں گے۔پراسپکٹس اور داخلہ فارم http://aiou.edu.pkسے ڈاؤن لوڈ کئے جاسکتے ہیں۔بیرون ملک مقیم پاکستانی اور انٹرنیشنل طلبہ مزید تفصیلا ت کے لئے انٹر نیشنل کولیبر یشن اینڈ ایکسچینج آفس سے ای میل [email protected] یا فون نمبر 92519572495 + پر رابطہ کر سکتے ہیں۔
