اسلام آباد(سٹاف رپورٹر )وفاقی حکومت کے محکموں کی رائٹ سائزنگ سے متعلق کابینہ کمیٹی کا اجلاس پیر کو وزارتِ خزانہ میں وفاقی وزیر برائے خزانہ و محصولات، سینیٹر محمد اورنگزیب کی زیر صدارت منعقد ہوا۔اجلاس میں وفاقی وزیر برائے بحری امور، محمد جنید انوار چوہدری، وفاقی وزیر برائے ریلوے محمد حنیف عباسی،وزارتِ خزانہ، اسٹیبلشمنٹ ڈویژن اور دیگر متعلقہ وزارتوں و محکموں کے سینئر افسران نے شرکت کی۔کمیٹی نے سفیرِ خصوصی سلمان احمد کی زیرِ صدارت سب کمیٹی کی جانب سے وزارتِ ریلوے کے بارے میں پیش کی گئی سفارشات کا جائزہ لیا۔
ان سفارشات میں ادارہ جاتی ڈھانچے کو بہتر بنانے، انسانی وسائل کی تقسیم کو منطقی انداز میں ترتیب دینے اور قومی ترجیحات کے مطابق محکماتی افعال کو ہم آہنگ کرنے پر زور دیا گیا تاکہ کارکردگی میں بہتری لائی جا سکے۔اجلاس میں وزارتِ بحری امور سے متعلق تعارفی سیشن بھی منعقد ہوا جس میں وزارت کی کارکردگی، جاری رد و بدل کی کوششوں، اور ان کے عوامی پالیسی و سروس ڈیلیوری پر اثرات کا جائزہ پیش کیا گیا۔ اس پریزنٹیشن میں وزارت کے ماتحت اداروں کی کارکردگی، ادارہ جاتی بہتری کے لئے مجوزہ اقدامات، تکرار کے خاتمے اور محدود وسائل میں بہتر نتائج حاصل کرنے کی حکمت عملی پر روشنی ڈالی گئی۔
سینیٹر محمد اورنگزیب نے اپنے خطاب میں کہا کہ رائٹ سائزنگ صرف اخراجات کم کرنے کا عمل نہیں بلکہ یہ ایک سٹریٹجک اصلاحاتی اقدام ہے جس کا مقصد سرکاری شعبے کی استعداد کار کو بہتر بنانا، احتساب کو مضبوط کرنا اور عوام کو بہتر خدمات فراہم کرنا ہے۔
انہوں نے مزید کہا کہ ہر وزارت اور محکمہ اپنے فرائض و دائرہ کار کو واضح اہداف اور قابلِ پیمائش کارکردگی کے اشاریوں کے ساتھ ہم آہنگ کرے تاکہ عوامی وسائل کا مؤثر استعمال ممکن بنایا جا سکے۔وفاقی وزیر خزانہ نے سرکاری شعبے میں وسیع تر اصلاحاتی ایجنڈے پر زور دیتے ہوئے کہا کہ حکومت ایک زیادہ ذمہ دار، نتائج پر مبنی اور عوام دوست انتظامی ڈھانچے کی تشکیل کے لئے پُرعزم ہے اور کابینہ کمیٹی اس سمت میں اپنی مشاورت اور کوششیں جاری رکھے گی۔
انہوں نے سب کمیٹی کی کوششوں کو سراہا اور تمام وزارتوں پر زور دیا کہ وہ اس عمل میں سرگرمی سے حصہ لیں اور اس بات کو یقینی بنائیں کہ شفاف جائزہ اور شواہد کی بنیاد پر فیصلے اس اصلاحاتی عمل کی بنیاد رہیں گے۔اجلاس میں متعلقہ وزارتوں سے مشاورت کے بعد آئندہ کے جائزوں اور قابلِ عمل منصوبوں کی تیاری کی ہدایت کی گئی۔
