اسلام آباد(سٹاف رپورٹر )وفاقی وزیر پارلیمانی امور ڈاکٹر طارق فضل چوہدری نے کہا ہے کہ آبادی میں اضافہ کی شرح تشویشناک ہے، پارلیمنٹیرینز، سیاسی جماعتوں اور میڈیا سمیت پوری قوم کو مل کر اس اہم مسئلہ کے حوالہ سے اپنا کردار ادا کرنا چاہئے جمعرات کو یہاں عالمی یوم آبادی کے موقع پر منعقدہ سیمینار سے خطاب کرتے ہوئے انہوں نے کہا کہ سیمینار میں تمام جماعتوں کے نمائندوں کی شرکت سے اس معاملہ کی اہمیت کا اندازہ لگایا جا سکتا ہے کیونکہ یہ ایک اہم قومی مسئلہ ہے، آبادی میں اضافہ کی وجہ سے وسائل پر دبائو بڑھ رہا ہے۔ انہوں نے کہا کہ 1950ء سے اب تک پاکستان کی آبادی میں سات گنا اضافہ ہو چکا ہے انہوں نے کہا کہ پاکستان ایک زرعی ملک ہے مگر آبادی میں بے انتہاء اضافہ کی وجہ سے ہمارے ملک کی ہیئت اور ساخت ہی بدل چکی ہے، جن دیہاتوں میں ہمیں پہلے کھیت نظر آتے تھے اب وہاں پر ہائوسنگ سوسائٹیوں کے بورڈ لگے ہوئے ہیں، یہ صورتحال آبادی میں اضافہ کی وجہ سے سامنے آ رہی ہے۔ انہوں نے کہا کہ کئی ترقی یافتہ ممالک نے آبادی میں اضافہ کو کنٹرول کرنے کیلئے مؤثر اقدامات کئے جس کی وجہ سے ان کی آبادی کم ہو گئی تھی اب وہی ملک آبادی میں اضافہ کرنے کی باتیں کر رہے ہیں۔
انہوں نے کہا کہ آبادی میں اضافہ کو روکنے کیلئے سیاسی جماعتوں اور پارلیمنٹیرینز کا کردار سب سے اہم ہے، سوشل میڈیا پر ہر طرح کی بات ہو رہی ہے مگر آبادی میں اضافہ کے حوالہ سے وہاں بھی خاموشی ہے، اسی طرح ٹی وی ٹاک شوز میں ہر موضوع پر بات کی جاتی ہے مگر آبادی میں اضافہ پر کوئی بات نہیں کرتا۔ ڈاکٹر طارق فضل چوہدری نے کہا کہ ملک میں نوجوانوں کی تعداد کا تناسب آبادی کے 50 فیصد سے بھی زیادہ ہے جبکہ سینئر سٹیزن کی تعداد کم ہو رہی ہے کیونکہ ہمارے پاس طبی سہولیات نہیں ہیں،جو نوجوان سوشل میڈیا پر ٹک ٹاک اور دوسری سرگرمیوں میں اپنے آپ کو مصروف رکھے ہوئے ہیں انہیں بھی آبادی میں اضافہ کی شرح کو کنٹرول کرنے کیلئے کردار ادا کرنا چاہئے۔ سیمینار کے انعقاد کے حوالہ سے انہوں نے وفاقی وزیر صحت مصطفیٰ کمال کو خراج تحسین پیش کرتے ہوئے کہا کہ اس اہم موضوع پر سیمینار کا انعقاد ایک قابل قدر کاوش ہے۔
