اسلام آبا د(سٹاف رپورٹر)وفاقی وزیرِ ریلوے محمد حنیف عباسی سے سابق وزیرِ اطلاعات، مسلم لیگ (ن) آزاد کشمیر کے سینئر نائب صدر راجہ مشتاق احمد منہاس نے راولپنڈی میں ملاقات کی۔ ملاقات میں مسلم لیگ (ن) آزاد کشمیر کے رہنما سردار فرحان اعظم بھی شریک تھے ، اس موقع پر آزاد جموں و کشمیر کی موجودہ سیاسی صورتحال اور باہمی دلچسپی کے امور پر تفصیلی تبادلہ خیال کیا گیا۔ وفاقی وزیرِ ریلوے محمد حنیف عباسی نے کہا کہ پاکستان کشمیری عوام کی سیاسی، اخلاقی اور سفارتی حمایت ہر سطح پر جاری رکھے گا۔ انہوں نے شہداء کشمیر کو خراجِ عقیدت پیش کرتے ہوئے کہا کہ کشمیریوں کی قربانیاں رائیگاں نہیں جائیں گی۔
محمد حنیف عباسی نے اس عزم کا اعادہ کیا کہ قائدِ پاکستان محمد نواز شریف کے ویژن اور وزیراعظم پاکستان محمد شہباز شریف کی قیادت میں عوامی خدمت کا مشن جاری رہے گا راجہ مشتاق احمد منہاس نے ریلوے کے شعبے میں جدت، بہتری اور ترقی کے اقدامات پر وفاقی وزیر کو مبارکباد پیش کی۔ انہوں نے کہا کہ محمد نواز شریف کشمیری عوام کے دلوں میں بستے ہیں، اور ان کی قیادت ہی حقیقی ترقی اور استحکام کی ضامن ہے انہوں نے مزید کہا کہ وزیراعظم شہباز شریف نے ملک کو سیاسی اور سفارتی بحران سے نکال کر درست سمت میں گامزن کر دیا ہے۔ انشاءاللہ آئندہ انتخابات میں مسلم لیگ (ن) آزاد کشمیر میں حکومت قائم کرے گی.
