اسلام آباد(سٹاف رپورٹر)وفاقی وزیر ریلوے محمد حنیف عباسی نے پشاور سے کراچی جانے والی عوام ایکسپریس کے واقعہ کا نوٹس لیتے ہوئے سات روز میں رپورٹ پیش کرنے کی ہدایت کی ہے۔ وزارت ریلوے کے مطابق عوام ایکسپریس کا واقعہ لودھراں ریلوے اسٹیشن کے قریب پیش آیا،حادثہ کے باعث 2 کوچز پٹری سے اتری اور لگیج وین سمیت 3 بوگیاں الٹ گئیں۔اطلاعات کے مطابق ایک مسافر جاں بحق جبکہ 21 مسافر زخمی ہوئے ہیں۔
وزارت ریلوے نے کہا ہے کہ دو شدید زخمیوں کو بہاولپور ہسپتال جبکہ باقی معمولی زخمیوں کو ڈی ایچ کیو ہسپتال لودھراں میں طبی امداد دی جارہی ہے۔وفاقی وزیر ریلوے نے ایک مسافر کے جاں بحق ہونے پر دکھ کا اظہار کرتے ہوئے زخمیوں کی جلد صحت یابی کے لیے دعا کی ہے۔ واضح رہے کہ ڈی ایس ملتان اور میڈیکل ٹیم جائے حادثہ پر پہنچ کر امدادی کاموں میں مصروف ہیں تاکہ مسافروں کو ہر قسم کی طبی سہولیات فراہم کی جائیں ۔
وفاقی وزیر ریلوے مھمد حنیف عباسی نے ریلوے عملہ کو امدادی کام جلد مکمل کرکے ڈاؤن ٹریک بحال کرنے کی ہدایت کی ہے۔ حادثہ والی ٹرین کے مسافروں کو متبادل ٹرین کے ذریعے منزل کی طرف روانہ کر دیا گیا جبکہ ٹرینوں کو اپ ٹریک سے گزارا جا رہا ہے کوئی ٹرین متاثر نہیں ہوئی۔وزیر ریلوے نے جائے حادثہ کی انکوائری کا حکم دیتے ہوئے کہا ہے کہ سات روز میں رپورٹ پیش کی جائے۔
