اسلام آباد (سٹاف رپورٹر)وفاقی وزیر ریلوے محمد حنیف عباسی نے آج امریکی سفارتخانے میں امریکہ کی ناظم الامور (Charge d’Affaires) مس نیتھلی اے بیکر (Natalie A. Baker) سے ملاقات کی۔ اس ملاقات میں پاک–امریکہ تعلقات کے فروغ، ریلوے کے شعبے میں باہمی تعاون اور سرمایہ کاری کے امکانات پر تفصیلی گفتگو کی گئی وفاقی وزیر ریلوے محمد حنیف عباسی نے اس موقع پر کہا کہ پاکستان ریلوے چاروں صوبوں کو جوڑنے والی زنجیر ہے، اور ملک کی معیشت ریلوے میں سرمایہ کاری کے بغیر ترقی نہیں کر سکتی۔ انہوں نے اس بات پر زور دیا کہ ریلوے میں سرمایہ کاری ملکی ترقی کی کنجی ہے اور حکومت اس شعبے کی بہتری کے لیے جامع حکمتِ عملی پر عمل پیرا ہے۔
امریکی ناظم الامور نیتھلی اے بیکر نے کہا کہ امریکہ پاکستان ریلوے کے جدید منصوبوں میں تعاون کے لیے پُرعزم ہے اور اس سلسلے میں مشترکہ اقدامات کے امکانات روشن ہیں ملاقات میں اقوامِ متحدہ کے آئندہ دورے کے حوالے سے بھی تبادلہ خیال کیا گیا اور باہمی دلچسپی کے امور پر کھل کر گفتگو ہوئی۔ دونوں رہنماؤں نے پاکستان اور امریکہ کے درمیان تعاون کو مزید مضبوط بنانے اور ترقیاتی منصوبوں کو آگے بڑھانے کے عزم کا اعادہ کیا یہ ملاقات پاکستان اور امریکہ کے درمیان تعلقات کے فروغ اور مشترکہ تعاون کے ایک نئے باب کا آغاز قرار دی جا رہی ہے.
