اسلام آباد(سٹاف رپورٹر) سیالکوٹ، لاہور اور گردونواح میں شدید بارشوں کے باعث متاثر ہونے والے ریلوے ٹریکس کو کلیئر کر دیا گیا ہےجس کے بعد پاکستان ریلوے نے لاہور تا راولپنڈی مین لائن ون پر ٹرین آپریشن بدھ کو دن کے وقت سے مکمل طور پر بحال کر دیا ہے،پاکستان ریلوے کے ترجمان کے مطابق مین لائن ون کی ٹریفک معمول کے روٹس کے مطابق بحال کر دی گئی ہے، راولپنڈی جانے والی تمام ٹرینیں اپنے مقررہ راستوں پر بجانب منزل روانہ ہوں گی،واضح رہے کہ گزشتہ روز شدید بارشوں اور سیلابی صورتحال کے باعث ٹرین آپریشن عارضی طور پر معطل کیا گیا تھا،منگل 27 اگست کو پیش آنے والی صورتحال کے پیش نظر متعدد ٹرینیں منسوخ اور بعض کو متبادل راستوں پر چلانے کا فیصلہ کیا گیا تھا۔
سبک خرام 103-اپ اور اسلام آباد ایکسپریس 107-اپ کو منسوخ کر دیا گیا، مسافروں کو ریفنڈ دیا گیا۔کراچی سے لاہور آکر مارگلہ جانے والی گرین لائن 5-اپ کو لاہور تک محدود کر دیا گیاجبکہ راولپنڈی جانے والے مسافروں کو تیزگام 7-اپ میں ایڈجسٹ کیا گیا تھا۔تیزگام 7-اپ کو متبادل راستے یعنی شاہدرہ، سانگلہ ہل، شاہین آباد، سرگودھا سے گزار کر راولپنڈی بھیجا گیا،سیالکوٹ ایکسپریس 171-اپ / 172-ڈاؤن بھی منسوخ کر دی گئی، مسافروں کو ریفنڈ فراہم کیا گیا۔تیزگام 8-ڈاؤن، جعفر ایکسپریس 40-ڈاؤن، عوام ایکسپریس 14-ڈاؤن، گرین لائن 6-ڈاؤن، رحمان بابا ایکسپریس 48-ڈاؤن کو لالہ موسی، سرگودھا، شاہین آباد، فیصل آباد، شورکوٹ کے راستے خانیوال بھیجا گیا،کراچی سے پشاور جانے والی خیبر میل 1-اپ کو لاہور، شاہدرہ، شیخوپورہ، شاہین آباد، سرگودھا، ملکوال کے راستے لالہ موسی سے گزار کر پشاور بھیجا گیا،لاہور سے خانیوال کے لیے براستہ ساہیوال دو شٹل ٹرینیں چلائی گئیں تاکہ متاثرہ مسافروں کو منزل تک پہنچایا جا سکے۔ڈویژنل سپرنٹنڈنٹ ریلوے لاہور انعام اللہ محسود کی ہدایت پر اسٹیشنز پر پسنجر فیسیلیٹیشن عملہ تعینات کیا گیا تاکہ مسافروں کو ہر ممکن رہنمائی فراہم کی جا سکے،ریلوے حکام نے عوام سے درخواست کی ہے کہ شیڈول اور دیگر معلومات کے لیے ریلوے انکوائری نمبرز 042-117 اور 042-99070011 پر رابطہ کریں۔
