اسلام آباد (سٹاف رپورٹر )وفاقی وزیر برائے سمندرپار پاکستانیز اور انسانی وسائل کی ترقی چوہدری سالک حسین نے جمعرات کو بونیر میں سیلاب سے متاثرہ علاقے کا تفصیلی دورہ کیا اور متاثرہ محنت کشوں میں ورکرز ویلفیئر فنڈ کی طرف سے امدادی چیک تقسیم کیے اس موقع پر وفاقی سیکرٹری ندیم اسلم چوہدری اور سیکرٹری ورکرز ویلفیئر فنڈ ذولفقار احمد بھی وفاقی وزیر چوہدری سالک حسین کے ہمراہ تھے آ مد کے بعد ڈپٹی کمشنر بونیر کاشف قیوم نے سیلاب سے ہونے والی تباہ کاریوں سے متعلق وفاقی وزیر کو تفصیلی بریفننگ دی .
متاثرہ محنت کشوں سے گفتگو کرتے ہوئے چوہدری سالک حسین نے کہا کہ دکھ اور مصیبت کی اس مشکل گھڑی میں ہم آ پ کے ساتھ کھڑے ہیں انہوں نے کہا کہ یہ دکھ صرف آ پ کا نہیں بلکہ ہم سب کا ہے اور آزمائش کے یہ لمحات ہمیں مایوس کرنے کے لیے نہیں بلکہ ہمیں اور مضبوط بنانے کے لیے آتے ہیں چوہدری سالک حسین نے کہا کہ ایسی مشکل گھڑی میں ہمیں ایک دوسرے کو سہارا دینے کی ضرورت ہے
انہوں نے کیا کہ ہم سیاست سے بالا تر ہو کر لوگوں کی خدمت پر یقین رکھتے ہیں کیونکہ ہم سب پاکستانی ہیں اور ایک قوم ہیں وفاقی وزیر چوہدری سالک حسین نے اس عزم کا اظہار کیا کہ ہم سب مل کرمتاثرہ لوگوں کو دوبارہ اپنے پاؤں پر کھڑا کریں گے اور ورکرز ویلفیئر فنڈ متاثرہ محنت کشوں کی بحالی تک امداد جاری رکھے گا.
بعد میں چوہدری سالک حسین متاثرہ گاؤں ملک آباد پہنچے اور جاں بحق ہونے والے افراد کیلئے فاتحہ خوانی کی اور ان کے لواحقین سے مل کر ہمدردی کا اظہار کیا اس موقع پر میڈیا سے گفتگو کرتے ہوئے انہوں نے کہا کہ وہ وزیر اعظم محمد شہباز شریف کے نمائندہ کے طور پر متاثرہ سے ملنے آئے ہیں وفاقی وزیر نے لواحقین کی طرف سے انفراسٹرکچر کی بحالی کے حوالے سے ڈپٹی کمشنر کو ہدایت کی کہ مطالبات کی جامع تفصیل وفاقی سیکرٹری کو ارسال کی جائےانہوں نے یقین دلایا کہ جو کام وفاقی حکومت کے دائرہ اختیار میں ہیں وہ ضرور پورے کیے جائیں گے معززین علاقہ نے چوہدری سالک حسین اور ورکرز ویلفیئر فنڈ کے سیکرٹری ذوالفقار احمد کا خصوصی شکریہ ادا کیا
