اسلام آباد (سٹاف رپورٹر )وفاقی وزیر داخلہ محسن نقوی سے برطانوی ہائی کمشنر جین میریٹ نے ملاقات کی جس میںپاک برطانیہ تعلقات اور مختلف شعبوں میں دوطرفہ تعاون بڑھانے ، انسداد دہشت گردی، انسداد منشیات، بارڈر سکیورٹی اور انسانی سمگلنگ کے حوالے سے اشتراک کار بڑھانے پر تبادلہ خیال کیا گیا۔برطانوی ہائی کمشنر جین میریٹ نے نشان امتیاز ملنے پر وزیر داخلہ محسن نقوی کو مبارکباد دی اور نیک تمناؤں کا اظہار کیا۔
برطانوی ہائی کمشنر نے پاکستان میں سیلاب اور بارشوں سے قیمتی انسانی جانوں کے ضیاع پر اظہار افسوس کیا۔ انہوں نے جاں بحق افراد کے خاندانوں سے دلی ہمدردی اور تعزیت کا اظہار کیا۔ وزیر داخلہ نے کہا کہ پاکستان ہمیشہ سے امن کا داعی رہا ہے، دہشت گردی کی ہر شکل کی پر زور مذمت کرتے ہیں محسن نقوی نے کہا کہ برطانیہ ترقی کے سفر میں پاکستان کا اہم شراکت دار ہے، باہمی مفاد کے تمام شعبوں میں برطانیہ کے ساتھ دوطرفہ تعاون کو فروغ دینا چاہتے ہیں۔
