اسلام آباد(سٹاف رپورٹر )وفاقی وزیر مذہبی امور سردار محمد یوسف نے ایران، عراق اور شام کی زیارات کے مجاز 24 ’’زیارت گروپ آرگنائزرز ‘‘ (ZGOs)کو سرٹیفکیٹ تقسیم کر دیے۔ تفصیلات کے مطابق وزارتِ مذہبی امور میں جمعہ کے روز منعقدہ ایک تقریب میں نئی رجسٹرڈ کمپنیوں کے نمائندوں سے خطاب کے دوران انہوں نے کہا نئی زیارت کمپنیاں زائرین کے سفر ، رہائش، خوراک اور دیگرسہولیات کی فراہمی کو یقینی بنائیں۔انہوں نے تمام نئے رجسٹرڈ ZGOs کو مبارکباد پیش کرتے ہوئے کہا کہ زیارات کی مجاز کمپنیاں زائرین کے سفر ، رہائش، خوراک اور دیگرسہولیات کی فراہمی کو یقینی بنائیں ۔
موجودہ حکومت نے زیارت پالیسی کو نافذ کرنے کا عمل شروع کیا ہے۔ حکومت نے فیصلہ کیا ہے کہ موجودہ سالار سسٹم جلد مکمل طور پر ختم کر دیاجائے گا۔ ایران، عراق ، شام کے زائرین صرف رجسٹر ڈ ZGOs کے ذریعے سفر کر سکیں گے۔ نئے نظام کے ذریعے زائرین کو بہتر سہولیات، شفاف طریقہ کار ، اور محفوظ سفر مہیا کیا جائے گا۔ انہوں نے اعداد کو شمار بتاتے ہوئے کہا کہ وزارت مذہبی امور کو اب تک رجسٹریشن کے لیے 1,413 درخواستیں موصول ہوئیں ہیں۔ اب تک 585 کمپنیوں کو سیکورٹی کلیئرنس ملی ہے ۔ پہلے مرحلے میں 24 کمپنیاں مطلوبہ دستاویزات مکمل کرنے پر رجسٹریشن کے لیے اہل قرار پائی ہیں۔
باقی کمپنیوں کو مطلوبہ دستاویزات مکمل کرنے پر رجسٹریشن سرٹیفکیٹ جاری کیا جائے گا۔ انہوں نے نئی زیارت پالیسی کے مطابق رجسٹریشن کے آغاز کو احسن طریقے سرانجام دینے پر شعبہ دعوۃ و زیارات کے افسران کی تعریف کی۔ تقریب میں ایڈیشنل سیکرٹری مذہبی امور ڈاکٹر ساجد محمود چوہان، جوائنٹ سیکرٹری زیارات احمد ندیم خان ، جوائنٹ سیکرٹری انتظامیہ صاحبزادہ، جوائنٹ سیکرٹری ڈویلپمنٹ محمد بخش سانگی، ڈپٹی سیکرٹری ناصر عزیز خان اور دیگر افسران بھی موجود تھے۔
