اسلام آباد ( سٹاف رپورٹر)وفاقی وزیرداخلہ محسن نقوی سے امریکہ کی قائم مقام سفیر نیٹلی بیکر نے ملاقات کی جس میں پاکستان امریکہ دو طرفہ تعلقات،پاکستان کو امریکہ میں مطلوب پاکستانیوں سمیت باہمی دلچسپی کے امور پرتبادلہ خیال کیا گیا۔ ملاقات میں بارڈر سیکورٹی، انسداد منشیات، کوسٹ گارڈز اور فرانزک کے شعبوں میں تعاون بڑھانے پر اتفاق ہوا۔
ترجمان وزارت داخلہ کے مطابق ملاقات کے دوران قائم مقام سفیر نیٹلی بیکر نے خیبرپختونخوا اور پنجاب میں سیلاب کے باعث جانی و مالی نقصان پر اظہار افسوس کا اظہار کیا۔ وزیر داخلہ محسن نقوی نےصدر ٹرمپ کی جانب سے پاکستان میں تیل کے ذخائر کو بڑھانے کیلئے مل کر کام کرنے کا بیان خوش آئند قرار دیا۔ انہوں نے کہا کہامریکی سرمایہ کار پاکستان میں تیل سمیت مختلف شعبوں میں سرمایہ کاری سے فائدہ اٹھا سکتے ہیں۔
انہوں نے کہا کہ امریکی سرمایہ کاروں کو ہر ممکن سہولتیں فراہم کی جائیں گی۔ امریکی قائمقام سفیر نے کہا کہ پاکستان کے ساتھ تعلقات کو خصوصی اہمیت دیتے ہیں۔ وفاقی سیکرٹری داخلہ محمد خرم آغا اور ایڈیشنل سیکرٹری داخلہ میجر جنرل نور ولی خان بھی اس موقع پر موجود تھے۔
