اسلام آباد (سٹاف رپورٹر )وزارتِ توانائی (پاور ڈویژن) نے سیلاب سے متاثرہ علاقوں میں بجلی کی بحالی میں 30 اگست تک کی پیش رفت کے حوالے سے رپورٹ جاری کر دی ہے۔ہفتہ کووزارتِ توانائی (پاور ڈویژن) کی جانب سے جاری رپورٹ کے مطابق پیسکو کے علاقے سوات، بنر، شانگلہ، صوابی اور ڈی آئی خان کے 12 گرڈز اور 91 فیڈرز متاثر ہوئے۔ پیسکو کے 84 فیڈرز مکمل اور 7 جزوی طور پر بحال کئے گئے ۔
رپورٹ کے مطابق پیسکو کے علاقے صوابی اور ڈی آئی خان میں بجلی کی بحالی کا کام مکمل کر لیا گیا ہے ،گیپکوکے زیرِ انتظام علاقوں سیالکوٹ، نارووال، وزیرآباد اور حافظ آباد کے 10 گرڈز اور 87 فیڈرز متاثر ہوئے ہیں، گیپکوکے 68 فیڈرز مکمل اور 17 جزوی طور پر بحال کر دیئے گئے ہیں ۔ لیسکو میں لاہور، اوکاڑہ، شيخوپورہ، قصور اور ننکانہ کے 56 متاثرہ فیڈرز جزوی طور پر بحال جبکہ مکمل بحالی 31 اگست تا 5 ستمبر تک متوقع ہے۔رپورٹ میں بتایا گیا کہ فیسکو کے زیرِ انتظام علاقوں فیصل آباد ، چنیوٹ، جھنگ، سرگودھا، میانوالی اور ڈی آئی خان کے 17 گرڈ اور 53 متاثرہ فیڈرز عارضی طور پر بحال کر دیئے گئے۔ میپکو کے زیرِ انتظام علاقوں میں 67 فیڈرز متاثر ہوئے ہیں،میپکو کے زیرِ انتظام علاقوں میں پانی اترتے ہی متاثرہ فیڈرز کی بحالی کا عمل فوری شروع ہو جائے گا۔ٹیسکو کے علاقے شمالی وزیرستان کے 2 متاثرہ فیڈرز عارضی طور پر بحال کر دئیے گئے ہیں، مکمل بحالی 5 ستمبر تک متوقع ہے۔
رپورٹ کے مطابق یوں مجموعی طور پر 39 گرڈ اور 356 متاثرہ فیڈرز میں سے 152 کو مکمل اور 202 کو عارضی طور پر بحال کر دیا گیا ہے۔ڈسکوز کی فیلڈ ٹیمیں دن رات بحالی کے کام میں مصروف ہیں، متاثرہ علاقوں میں بجلی کی فراہمی جلد از جلد مکمل بحال کی جائے گی۔
