کوہاٹ(سٹاف رپورٹر )پاک فوج کے زیر اہتمام کوہاٹ میں ضلع کرم میں دیرپا امن کیلئے بین المذاہب ہم آہنگی کانفرنس کا انعقادکیاگیا۔پاک فوج کے زیر اہتمام علماء کانفرنس کو شرکاء کی جانب سے خوب سراہا گیا۔
علامہ ڈاکٹر مفتی راغب حسین نعیمی اور جی او سی 9 ڈیو مہمان خصوصی تھے ۔کانفرنس میں علمائے کرام ،سول انتظامیہ ،مشران اور120دیگر عمائدین و طلباء نے شرکت کی ۔
اہل سنت اور اہل تشیع علما ءکرام نے پاکستان کیلئے اتحاد، امن، معافی اور محبت کی اہمیت پر زور دیا۔جی او سی نے کرم میں امن برقرار رکھنے پر قبائلی عمائدین کے کردار کو سراہا۔جی او سی نے بھائی چارے اور امن معاہدوں کی تکمیل پر زور دیا ۔کمشنر کوہاٹ نے اسلحہ، بنکروں کے خاتمے اور کوہاٹ امن معاہدے کے نفاذ پر زور دیا
علمائے کرام کے مشترکہ “اعلامیہ برائے بین المسالک ہم آہنگی” کے مطابق کرم میں پائیدار امن کیلئے علماء، انتظامیہ، مشران اور دیگر عمائدین کا مشاورتی اجلاس منعقد ہوا ۔اجلاس میں شرکاء کا ضلع کرم میں ہم آہنگی اور استحکام یقینی بنانے کیلئے مشترکہ عزم کا اعادہ کیاگیا۔
جاری اعلامیہ کے مطابق اسلام ہمیں باہمی بھائی چارے، محبت ،ایک دوسرے کا احترام اور اخوت کا درس دیتا ہے ، نبی اکرم ﷺ نے امت کو ایک جسم قرار دیا ہے، تمام شریک علماء متفق ہیں کہ ترقی اور خوشحالی کا حل اتحاد،اتفاق اور باہمی رواداری میں مضمر ہے۔
اعلامیہ میں مزید کہاگیاکہ مذہب میں معاشرے کی بنیاد ہمدردی، رحم دلی اور اچھے سلوک پر مبنی ہے۔اختلافِ رائے کو دشمنی کا ذریعہ بنانا، اسلام کے اصولوں اور تعلیمات کے منافی ہے۔بطور مسلمان کسی بھی قسم کی شدت پسندی اور بد امنی کی بھرپور مذمت ہم سب پر لازم ہے۔
اعلامیہ میں مزید کہاگیا کہ امن و امان کے قیام میں ریاستی اداروں کا ساتھ دینا ہم سب کا دینی فریضہ ہے علماء اور شہری مذہبی ہم آہنگی کو فروغ دیں اور امن معاہدے کی پاسداری یقینی بنائیں ،شہری امن کیلئے مورچوں کو مسمار کرنےاور غیر قانونی ہتھیاروں کو جمع کرانے پر تعاون کریں۔
اعلامیہ میں کہاگیا ہے کہ کرم کے شہری شرپسند عناصرکے خلاف قانونی کارروائی کرنے میں اپنا بھرپور تعاون کریں ، افواہوں اور سوشل میڈیا پر پھیلائی جانے والی نفرت سےخود کو بچائیں اورنفرت پھیلانے والوں کا محاصرہ کریں۔پاک فوج کے زیر اہتمام علماء کانفرنس کو شرکاء کی جانب سے خوب سراہا گیا۔
