اسلام آباد (سٹاف رپورٹر ) فلسطین کے چیف اسلامک جسٹس اور صدر کے مشیر برائے مذہبی امور و اسلامی تعلقات ڈاکٹر محمود الحبش کی قیادت میں ایک اعلیٰ سطحی فلسطینی وفد آج حکومتِ پاکستان کے مہمانِ خصوصی کی حیثیت سے اسلام آباد پہنچا ڈاکٹر محمود الحبش، جو ایک ممتاز مذہبی اسکالر اور جج ہیں، کے ہمراہ احمد حسین، شریعت جج و عالمِ القدس اور مسجد اقصیٰ، غسان الرجابی، شریعت جج و عالمِ مسجدِ ابراہیمی، اور حمزہ دعنہ ،ڈائریکٹر جنرل دفتر چیف اسلامک جسٹس شامل ہیں۔
وفد پاکستان میں منعقد ہونے والی بین الاقوامی سیرت النبی ﷺ کانفرنس 2025 میں شرکت کے لیے آیا ہے جو 12 ربیع الاول کو اسلام آباد میں منعقد ہوگی۔ کانفرنس کے اس پچاسویں ایڈیشن میں دنیا بھر کے ممتاز علما، اور مذہبی رہنما شریک ہوں گے تاکہ حضور نبی کریم ﷺ کی سیرتِ طیبہ اور تعلیمات پر روشنی ڈالی جا سکے وزارتِ مذہبی امور و بین المذاہب ہم آہنگی کے سینئر حکام نے ایئرپورٹ پر معزز فلسطینی مہمانوں کا پُرتپاک استقبال کیا اور پاکستان کی جانب سے فلسطین کے ساتھ دیرینہ یکجہتی کا اعادہ کیا۔
بین الاقوامی سیرت النبی ﷺ کانفرنس ہمیشہ سے امن، رواداری اور بین المذاہب ہم آہنگی کے فروغ کا ایک عالمی پلیٹ فارم رہی ہے۔ اس سال کا موضوع ہے’’سوشل میڈیا کے مفید استعمال کی تعلیم وتربیت میں ریاستی ذمہ داریاں۔ سیرت النبی ﷺ کی روشنی میں‘‘.
