اسلام آباد(سٹاف رپورٹر)پاور ڈویژن نے سیلاب سے متاثرہ علاقوں میں بجلی کی بحالی کے حوالے سے 4 ستمبر تک کی تفصیلی رپورٹ جاری کر دی ہے جس کے مطابق مجموعی طور پر 16 لاکھ 23 ہزار 413 متاثرہ صارفین میں سے 13 لاکھ 7 ہزار 559 صارفین کو بجلی کی فراہمی بحال کر دی گئی ہے، جبکہ باقی 3 لاکھ 15 ہزار 854 صارفین کیلئے بجلی کی بحالی کو ترجیحی بنیادوں پر مکمل کیا جا رہا ہے۔
رپورٹ کے مطابق پیسکو کے علاقوں سوات، بنوں، شانگلہ، صوابی اور ڈی آئی خان میں 12 گرڈ اسٹیشنز اور 91 فیڈرز متاثر ہوئے، جن میں سے 85 فیڈرز مکمل اور 6 جزوی طور پر بحال کر دیے گئے ہیں۔ پیسکو کے 463375 متاثرہ صارفین میں سے 459921 کو بجلی کی فراہمی بحال کی جا چکی ہے، جبکہ باقی 3454 صارفین کیلئے بحالی کا کام 4 سے 12 ستمبر کے دوران مکمل کر لیا جائے گا۔ صوابی اور ڈی آئی خان میں مکمل بحالی ہو چکی ہے۔
گیپکو کے زیر انتظام علاقوں میں 11 گرڈز اور 103 فیڈرز متاثر ہوئے، جن میں سے 88 مکمل اور 16 جزوی بحال ہیں۔ 735987 متاثرہ صارفین میں سے 660509 صارفین کو بجلی فراہم کی جا چکی ہے، باقی 75478 صارفین کو سیلابی پانی کے اترنے کے بعد بجلی دی جائے گی۔
لیسکو کے علاقوں لاہور، اوکاڑہ، شیخوپورہ، قصور اور ننکانہ صاحب میں 67 فیڈرز متاثر ہوئے، جن میں سے 44 مکمل اور 23 جزوی طور پر بحال کیے جا چکے ہیں۔ 73634 متاثرہ صارفین میں سے 59067 کو بجلی فراہم کی جا چکی ہے، اور بقیہ 14567 صارفین کیلئے بحالی 4 سے 5 ستمبر کے دوران مکمل کی جائے گی۔
فیسکو کے زیر انتظام فیصل آباد، چنیوٹ، جھنگ، سرگودھا، میانوالی اور دیگر علاقوں میں 26 گرڈ اور 77 فیڈرز متاثر ہوئے، جن میں سے 19 مکمل اور 54 عارضی طور پر بحال ہیں۔ 198616 صارفین میں سے 93331 کو بجلی بحال کی جا چکی ہے، جبکہ بقیہ 105285 صارفین کیلئے بحالی 4 سے 5 ستمبر کے دوران مکمل ہو گی۔
میپکو کے علاقوں میں 139 فیڈرز متاثر ہوئے، جس سے 96537 صارفین متاثر ہوئے۔ سیلابی پانی اترنے پر بحالی کا کام فوری طور پر شروع کیا جائے گا۔
ٹیسکو کے شمالی وزیرستان اور خیبر کے علاقوں میں 17 فیڈرز متاثر ہوئے، جن میں سے 2 مکمل اور 11 عارضی طور پر بحال ہیں۔ 31599 متاثرہ صارفین میں سے 7302 کو بجلی فراہم کی جا چکی ہے، باقی 24297 صارفین کیلئے بحالی کا عمل 5 ستمبر شام 5 بجے تک مکمل ہونے کی توقع ہے۔
ہیزیکو کے علاقے مانسہرہ میں متاثرہ 3 فیڈرز مکمل طور پر بحال کر دیے گئے ہیں۔
پاور ڈویژن کے مطابق مجموعی طور پر ملک بھر میں 49 گرڈز اور 497 متاثرہ فیڈرز میں سے 239 مکمل اور 249 جزوی طور پر بحال ہو چکے ہیں۔ بجلی کی بحالی کا عمل ہنگامی بنیادوں پر جاری ہے تاکہ تمام متاثرہ صارفین کو جلد از جلد بجلی کی سہولت فراہم کی جا سکے۔
