اسلام آباد (سٹاف رپورٹر )نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر نے گلگت بلتستان اور آزاد کشمیر میں بارشوں کے پیش نظر لینڈ سلائیڈز کے خدشے سے آگاہ کرتے ہوئے الرٹ جاری کر دیا ہے متوقع بارشوں کی وجہ سے گلگت بلتستان اور آزاد کشمیر کے حساس علاقوں میں لینڈ سلائیڈنگ کا خطرہ بڑھ گیا ہے۔ خاص طور پر کشمیر کے اضلاع مظفرآباد، نیلم ویلی، حویلی، باغ، پونچھ اور سدھنوتی میں شدید بارشوں کا امکان ہے بارشوں اور ممکنہ سیلابی صورتحال کے باعث شاہراہ قراقرم کے متعدد مقامات پر لینڈ سلائیڈز کا خدشہ بڑھ گیا ہے۔ لینڈ سلائیڈنگ سے ٹورغر روڈ (120)، بٹگرام روڈ (140)، شانگلہ روڈ (160)، لوئر کوہستان روڈ (180)، اور تتا پانی روڈ (320 تا 360) متاثر ہو سکتے ہیں اسی طرح گلگت روڈ (400 تا 420)، ہنزہ روندو، اسکردو اور چترال کے مختلف مقامات پر بھی لینڈ سلائیڈنگ کے خطرات موجود ہیں۔
این ڈی ایم اے نے شہریوں کو ہدایت کی ہے کہ پہاڑی علاقوں میں لینڈ سلائیڈز کے خطرے کے پیشِ نظر غیر ضروری سفر سے گریز کریں اور موسم و سڑکوں کی صورتحال سے باخبر رہنے کے لیے ریڈیو، ٹی وی اور پاک این ڈی ایم اے ڈیزاسٹر الرٹ ایپ سے رہنمائی حاصل کریں نیشنل ایمرجنسی آپریشن سینٹر 24 گھنٹے مکمل فعال ہے اور این ڈی ایم اے سول و عسکری اداروں کے ساتھ رابطے میں ہے۔ مقامی انتظامیہ کی ہدایات پر فوری عمل درآمد اور ہنگامی حالات میں امدادی ٹیموں سے رابطہ کرنے کی بھی تاکید کی گئی ہے۔
