اسلام آباد (سٹاف رپورٹر )وزیراعظم محمد شہباز شریف کی خصوصی ہدایت پر نیشنل ڈیزاسٹر مینجمنٹ اتھارٹی (این ڈی ایم اے) کی جانب سے پنجاب کے سیلاب متاثرہ علاقوں میں امدادی سرگرمیاں تیزی سے جاری ہیں۔ اسلام آباد میں قائم این ڈی ایم اے کے مرکزی ویئر ہاؤس سے آج مزید امدادی سامان روانہ کیا گیا، جو 20 ٹرکوں پر مشتمل ہے۔
یہ امدادی سامان صوبائی ڈیزاسٹر مینجمنٹ اتھارٹی (پی ڈی ایم اے) پنجاب کے حوالے کیا جائے گا تاکہ متاثرین تک بروقت اور منظم انداز میں پہنچایا جا سکے۔ بھیجے گئے سامان میں فولڈنگ بیڈز، بسترے، ہیٹرز اور رضائیاں شامل ہیں ۔
اس سے قبل 9 ستمبر کو بھی 10 ٹرکوں پر مشتمل امدادی قافلہ روانہ کیا گیا تھا، جبکہ مقامی سطح پر قائم ویئر ہاؤسز سے کمبل اور پانی کے کین بھی متاثرہ علاقوں کے لیے فراہم کیے جا چکے ہیں۔
اب تک پنجاب کو مجموعی طور پر 1,513 ٹن امدادی سامان فراہم کیا جا چکا ہے، جس میں خیمے، مچھر دانیاں، پانی کے فلٹریشن پلانٹس، فولڈنگ بیڈز، پانی کے کین اور رضائیاں شامل ہے۔ اس کے علاوہ سیلابی علاقوں تک رسائی کے لیے 17 کشتیاں بھی فراہم کی گئی ہیں۔
این ڈی ایم اے تمام سول اور عسکری اداروں کے ساتھ مکمل رابطے میں ہے، اور جاری امدادی کارروائیوں کی ہمہ وقت نگرانی کر رہا ہے تاکہ کسی بھی قسم کی رکاوٹ یا تاخیر سے بچا جا سکے۔
