اسلام آباد (سٹاف رپورٹر)خصوصی سرمایہ کاری سہولت کونسل (ایس آئی ایف سی) کی موثر حکمت عملیوں اور سیکیورٹیز اینڈ ایکسچینج کمیشن آف پاکستان (ایس ای سی پی) کی کاوشوں سے پاکستان کاروباری وسعت اور سرمایہ کاری کے نئے دور میں داخل ہو گیا ہے۔ تفصیلات کے مطابق کامیاب حکمت عملی کے تحت اگست 2025 میں ایس ای سی پی کے تحت 3,278 نئی کمپنیوں کی رجسٹریشن مکمل ہوئی، جس سے ملک میں رجسٹرڈ کمپنیوں کی مجموعی تعداد 2 لاکھ 65 ہزار 587 تک پہنچ گئی۔
اس عرصے کے دوران 7.74 ارب روپے کے سرمائے کے ساتھ 37 نئے کاروباری لائسنس جاری کیے گئے۔ نئی رجسٹرڈ کمپنیوں میں 59 فیصد پرائیویٹ لمیٹڈ، 39 فیصد واحد رکن کمپنیاں، اور بقیہ پبلک ان لسٹڈ اداروں پر مشتمل ہیں۔ آئی ٹی اور ای-کامرس شعبہ 670 نئی کمپنیوں کے ساتھ سرفہرست رہا، جبکہ ٹریڈنگ، سروسز، کنسٹرکشن، سیاحت، ٹرانسپورٹ، فوڈ، ایجوکیشن، ٹیکسٹائل، اور فارماسیوٹیکل سیکٹرز بھی نمایاں رہے۔
غیر ملکی سرمایہ کاری میں بھی مثبت اضافہ دیکھا گیا، جہاں 78 نئی کمپنیوں نے عالمی سرمایہ کاروں کا اعتماد حاصل کیا۔ ایس آئی ایف سی کی معاونت سے پاکستان نہ صرف کاروباری مواقع بڑھانے میں کامیاب ہوا بلکہ عالمی شراکت داریوں کے ذریعے معاشی ترقی کے نئے امکانات بھی پیدا کر رہا ہے۔ ماہرین کے مطابق، یہ پیش رفت پاکستان کو خطے میں سرمایہ کاری کا ایک پرکشش مرکز بنانے کی جانب اہم قدم ہے۔
