اسلام آباد (سٹاف رپورٹر )کنسلٹنٹ گائناکالوجسٹ ڈاکٹر عروج یاسر خان نے کہا ہے کہ پاکستان میں ہر سال تقریباً 5,000 خواتین سروائیکل کینسر کا شکار ہوتی ہیں کیونکہ ہمارے پاس قومی سطح کا کینسر رجسٹری سسٹم موجود نہیں۔یہاں جاری بیان کے مطابق کیپیٹل ہسپتال میں ایک آگاہی سیشن کے دوران پاکستان میں سروائیکل کینسر کی سنگین صورتحال اور اس کے حل کے لیے اہم اقدامات پر روشنی ڈالتے ہوئے انہوں نے کہا کہ اس بڑھتے ہوئے مسئلے سے نمٹنے کے لیے حکومت پاکستان نے گوی (Gavi) اور عالمی ادارہ صحت (ڈبلیو ایچ او) کے تعاون سے 15 ستمبر 2025ء سے پائلٹ ایچ پی وی ویکسینیشن پروگرام شروع کرنے کا اعلان کیا ہے۔
اس مرحلے میں پنجاب، سندھ، آزاد جموں و کشمیر اور اسلام آباد میں 9 تا 14 سال کی عمر کی تقریباً 1 کروڑ 50 لاکھ لڑکیوں کو ایک خوراک پر مشتمل ویکسین دی جائے گی۔انہوں نے کہا کہ 2026 سے یہ ویکسین باقاعدہ توسیعی پروگرام برائے حفاظتی ٹیکہ جات (ای پی آئی) میں شامل ہو جائے گی جس کے بعد اس کا دائرہ پورے ملک تک پھیلایا جائے گا اور تقریباً 1 کروڑ 78 لاکھ بچیوں کو ویکسین فراہم کی جائے گی، ڈاکٹر عروج یاسر خان نے کہا کہ یہ اقدام پاکستان کی آئندہ نسلوں کی صحت کے تحفظ میں ایک تاریخی سنگ میل ہے، لیکن اس کی کامیابی عوامی شعور پر منحصر ہے۔ انہوں نے کہا کہ اس پروگرام کو کامیاب بنانے کے لیے گائناکالوجسٹس، پیڈیاٹریشنز، نرسز، کمیونٹی ہیلتھ ورکرز اور اساتذہ کو آگے بڑھ کر کردار ادا کرنا ہوگا تاکہ معاشرے میں آگاہی پھیلائی جا سکے اور غلط فہمیوں کا خاتمہ کیا جا سکے۔
