کراچی(سٹاف رپورٹر )گورنر سندھ کامران خان ٹیسوری چین کے صنعتی شہر شوژو پہنچے تو میئر شوژو، پاکستانی سفارتکار اور ان کی ٹیم نے ریلوے اسٹیشن پر ان کا پرتپاک استقبال کیااورخیرمقدمی بینرز کے ذریعے پاکستان اور چین کی دوستی کو خراجِ تحسین پیش کیا گیا۔اتوار کو یہاں گورنر ہائوس سے جاری اعلامیہ کے مطابق گورنر سندھ نے شوژو میونسپل پیپلز گورنمنٹ کی سیکرٹری جنرل اور دیگر اعلیٰ حکام سے اہم ملاقات کی اوردوطرفہ تعلقات، باہمی تجارت میں اضافے، سرمایہ کاری کے مواقع، انفراسٹرکچر کے منصوبے، انرجی سیکٹر میں تعاون اور سماجی و ثقافتی روابط کے فروغ پر تفصیلی تبادلہ خیال کیا۔
ملاقات میں حیدرآباد اور شوژو کو ’’سسٹر سٹیز‘‘ قرار دینے کی تجویز بھی پیش کی گئی، دونوں رہنمائوں نے باہمی رضامندی سے اس تجویز پر مثبت پیش رفت کا عندیہ دیتے ہوئے کہا کہ یہ اقدام دونوں شہروں کے درمیان صنعتی، تعلیمی، ثقافتی اور تجارتی شعبوں میں تعاون کو نئی جہت دے گا۔اس موقع پرگورنر سندھ کامران ٹیسوری نے کہا کہ چین کی حیران کن ترقی میں 60 ہزار ڈیموں کی تعمیر نے اہم کردار ادا کیا ہے اور پاکستان کی پائیدار ترقی کے لیے بھی ڈیموں کی تعمیر وقت کی اہم ضرورت ہے۔ انہوں نے کہا کہ سندھ صوبہ انفراسٹرکچر، انرجی، صنعت اور دیگر شعبوں میں سرمایہ کاری کے وافر مواقع فراہم کرتا ہے۔
انہوں نے مزید کہا کہ سرمایہ کاروں کو ایس آئی ایف سی (سپیشل انویسٹمنٹ فیسیلیٹیشن کونسل )کے تحت ون ونڈو آپریشن کے ذریعے تمام سہولیات فراہم کی جا رہی ہیں تاکہ کاروباری سرگرمیوں کو آسان بنایا جا سکے۔ گورنرسندھ نے اس عزم کا اعادہ کیا کہ وزیر اعظم پاکستان محمد شہباز شریف اور فیلڈ مارشل عاصم منیر ملکی معیشت کی مضبوطی اور ترقی کے لیے فعال اقدامات کر رہے ہیں۔
انہوں نے کہا کہ پاکستان اور چین کے شہروں کے درمیان تعلقات مضبوط ہونے سے معاشی اور صنعتی ترقی کو نئی سمتیں ملیں گی اور یہ شراکت داری دونوں ممالک کے عوام کے لیے بہتر مواقع پیدا کرے گی۔ گورنر سندھ کے اس دورے کو پاک-چین تعلقات کے فروغ اور صوبہ سندھ میں سرمایہ کاری کے امکانات کے تناظر میں ایک اہم پیش رفت قرار دیا جا رہا ہے۔
