اسلام آباد (سٹاف رپورٹر)فاقی وزیر خزانہ ومحصولات سینیٹر محمد اورنگزیب نے کہاہے کہ گلگت بلتستان بے پناہ قدرتی خوبصورتی کا حامل خطہ ہے اور سیاحت پر مبنی ترقی کی بے حد صلاحیت رکھتا ہے۔انہوں نے یہ بات جمعہ کویہاں وزیر اعلیٰ گلگت بلتستان حاجی گلبر خان سے ملاقات میں کہی ملاقات کے دوران وزیرخزانہ نے اپنے حالیہ دورہ گلگت بلتستان کا حوالہ دیتے ہوئے خطے میں سیلاب کی صورتحال اور اس سے متعلق امدادی سرگرمیوں، بالخصوص وفاقی فنڈز کے اجراء پر تبادلہ خیال کیا۔ انہوں نے سڑکوں کے بنیادی ڈھانچے میں ہونے والی پیش رفت اور سیاحت کے شعبے میں سرمایہ کاری کو سراہا اور کہا کہ گلگت بلتستان بے پناہ قدرتی خوبصورتی کا حامل خطہ ہے جو سیاحت پر مبنی ترقی کی بے حد صلاحیت رکھتا ہے۔
وزیر خزانہ نے زور دیا کہ سرمایہ کاری ہمیشہ ذمہ دارانہ ہونی چاہیے، تعمیراتی قواعد و ضوابط کے ساتھ ساتھ ماحولیاتی قوانین خاص طور پر کچرے اور پانی کے انتظامات کے حوالہ سے قواعد وضوابط کی سختی سے پابندی کی جائے تاکہ مقامی ماحولیاتی نظام محفوظ رہے۔ انہوں نے گلگت بلتستان حکومت کو نئے محصولات کے ذرائع تلاش کرنے کی ترغیب دی اور خاص طور پر خلیجی ممالک سے آنے والے سیاحوں کے لیے پیکیج ٹورازم کے فروغ کے لیے ہوائی اڈوں، سڑکوں اور سیاحتی مقامات کی ترقی پر زور دیا۔
وزیر اعلیٰ گلبر خان نے وزیر خزانہ کو خطے میں جاری ترقیاتی منصوبوں پر بریفنگ دیتے ہوئے بتایا کہ سکردو انٹرنیشنل ایئرپورٹ پر مسافروں کی بڑی تعداد میں آمد و رفت جاری ہے جبکہ گلگت ایئرپورٹ کو بین الاقوامی معیار کے مطابق اپ گریڈ کرنے کی منصوبہ بندی بھی کی جا رہی ہے تاکہ سیاحت کو مزید فروغ ملے۔ انہوں نے گلگت بلتستان پر مسلسل توجہ دینے پر وزیر اعظم شہباز شریف اور وفاقی حکومت کا شکریہ ادا کیا۔وزیر اعلیٰ نے وزیر خزانہ کو آگاہ کیا کہ گلگت بلتستان حکومت خطے کے 10 اضلاع میں عوامی خدمات کو بہتر بنانے کے لیے عملے میں اضافہ کر رہی ہے اور جی بی سیکریٹریٹ میں سینئر افسران کے لیے کیریئر میں ترقی کے بہتر مواقع فراہم کرنے پر بھی کام جاری ہے۔
