اسلام آباد (سٹاف رپورٹر )وزارت مذہبی امور کے زیر اہتمام چالیسواں قومی مقابلہ حفظ و قرآت شروع ہو گیا۔ وفاقی سیکرٹری مذہبی امور ڈاکٹر سید عطا الرحمن نے دو دوزہ قومی مقابلے کے افتتاحی تقریب سے خطاب کے دوران کہا کہ ایسے مقابلے نوجوان نسل میں تلاوت قرآن کریم کے اہتمام اور متعلقہ علوم سیکھنے کا شوق دلاتے ہیں۔
وزارت مذہبی امور ملک بھر کے حفاظ کرام، قراء و قارعات کی حوصلہ افزائی جاری رکھے گی۔ واضح رہے کہ ملک بھر سے ضلعی و صوبائی مقابلوں میں منتخب حفاظ و قراء قومی مقابلے میں شریک ہو رہے ہیں۔ دو روزہ قومی مقابلہ حفظ قران و حُسنِ قرآت کے فاتحین کا اعلان جمعرات کو کیا جائے گا۔
چاروں صوبوں بشمول گلگت بلتستان، آزاد کشمیر و اسلام آباد اور آرمڈ فورسز سے منتخب حفاظ اور قراء مقابلے میں حصہ لیں گے۔ حافظہ اور قاریہ خواتین اور بچیوں کے لیے چار الگ کیٹگریاں مختص کی گئی ہیں۔ قومی مقابلہ حفظ و قرآت کے انعام یافتگان کو نقد انعامات اور عالمی مقابلوں میں پاکستان کی نمائندگی کا موقع ملے گا۔ چار سینئر قرا اور خطیب حضرات مقابلے کے منصفین کے فرائض سرانجام دے رہے ہیں۔
