اسلام آباد (سٹاف رپورٹر )عالمی نشریاتی ادار ہ سی این این نے اعتراف کیاہے کہ پاکستان کی عسکری و سفارتی حکمت عملی نے عالمی سطح پر ملک کا وقار بلند کر دیا،پاکستان کی مثبت حکومتی اور عسکری سفارتکاری نے خطہ میں پاکستان کی اہمیت مزید بڑھا دی، پہلگام فالس فلیگ کی آڑ میں بھارت کی پاکستان کو عالمی سطح پر تنہا کرنے کی کوشش ناکام رہی ہے۔ عالمی نشریاتی ادارہ سی این این نے بھی پاک امریکا قریبی اور سٹریٹجک تعلقات کا اعتراف کر لیا۔سی این این پر جاری تجزیاتی رپورٹ میں تجزیہ کار فرید ذکریا نے کہا ہے کہ امریکی صدر ٹرمپ نے امریکہ اور بھارت کے مابین پالیسی کا رخ اچانک بدل دیا۔
پہلے دور حکومت میں بھارتی وزیراعظم کے قریب سمجھے جانے والے ٹرمپ اب فیلڈ مارشل سید عاصم منیر کے گرویدہ ہیں، مصر کانفرنس میں ٹرمپ نے فیلڈ مارشل عاصم منیر کو اپنا “پسندیدہ فیلڈ مارشل” قرار دیا۔سی این این کے مطابق امریکا اور پاکستان کے درمیان معاشی تعاون بھی بڑھ رہا ہے،جولائی میں امریکااور پاکستان نے ٹیرف معاہدہ کیا اور پاکستانی تیل کے ذخائر پر مشترکہ تعاون کا اعلان کیا۔ امریکا نے یہ محسوس کیا ہے کہ پاکستان ایک موثر عسکری شراکت دار ہے۔ اسی عسکری صلاحیت نے سعودی عرب کو بھی متاثر کیا جس نے حال ہی میں پاکستان کے ساتھ دفاعی معاہدہ کیا۔ پاکستان کی سفارتی اور عسکری کامیابی نے پاکستان کی عالمی شناخت مستحکم کر دی ہے۔
