اسلام آباد (سٹاف رپورٹر )علامہ اقبال اوپن یونیورسٹی اور یونس ایمرے انسٹی ٹیوٹ پاکستان نے اپنی اپنی حکومتوں کی ہدایات پر30اکتوبر تا5نومبر تک’’پاک۔ترکیہ تعلقات کا ہفتہ ‘‘منانے کا اعلان کیاہے۔ اس حوالے سے دونوں ممالک کے درمیان گہرے تاریخی، ثقافتی اور علمی تعلقات کے فروغ کے حوالے سے 30 اکتوبر کو انٹرنیشنل کانفرنس منعقد کی جائے گی۔تقریبات کے سلسلے میں ترکیہ کی تہذیب و ثقافت پر مبنی تصویری نمائش بھی منعقد کی جائے گی جس میں ترکیہ کے فن، ورثے اور جدید ترقی کو اجاگر کیا جائے گا، اس کے ساتھ ساتھ طلبہ کے درمیان روایتی تیر اندازی کا مقابلہ بھی ہوگا جو ترکیہ کی قدیم کھیلوں کی روایت کو خراجِ تحسین پیش کرے گا۔
ان تقریبات کی جامع منصوبہ بندی ڈائریکٹوریٹ آف انٹرنیشنل کولیبریشن اینڈ ایکسچینج اور ڈائریکٹوریٹ آف سٹوڈنٹس ایڈوائزری اینڈ کونسلنگ سروسز نے ترکیہ کے یونس ایمرے انسٹی ٹیوٹ کے تعاون سے وائس چانسلر علامہ اقبال اوپن یونیورسٹی پروفیسر ڈاکٹر ناصر محمود کی خصوصی ہدایت پر کی ہے۔ یونس ایمرے انسٹی ٹیوٹ کے ڈائریکٹر ڈاکٹر خلیل طوقار کے مطابق ان تقریبات کا مقصد دونوں برادر ممالک( پاکستان اور ترکیہ)کے درمیان علمی، ثقافتی اور تاریخی تعلقات کو مزید مضبوط بنانا ہے۔وائس چانسلر علامہ اقبال اوپن یونیورسٹی نے کہا کہ ان تقریبات سے طلبہ کو ترکیہ کی تاریخ، فن، ثقافت اور معاشرتی اقدار کو قریب سے جاننے کا موقع ملے گا جبکہ علمی سطح پر پاک۔ترکیہ تعلقات کو فروغ دینے کے نئے امکانات پیدا ہوں گے۔
