اسلام آباد (سٹاف رپورٹر)وفاقی وزیر مذہبی امور سردار محمد یوسف کی زیر صدارت قومی علماء و مشائخ کونسل کا دوسرا اجلاس کل بدھ کے روز اسلام آباد میں منعقد ہو گا۔ علماء و مشائخ کونسل میں ملک بھر سے تمام مسالک کے جید علمائے کرام کو نمائندگی حاصل ہے جبکہ چاروں صوبوں ، گلگت بلتستان اور آزاد جموں و کشمیر کے وزرائے اوقاف، مذہبی امور بھی کونسل کا حصہ ہیں ۔ مختلف معاشرتی مسائل کی نشاندہی اور اصلاح کے لیے علمائے کرام سے رہنمائی اور مشاورت کونسل کے قیام کے اغراض و مقاصد میں شامل ہے۔
واضح رہے کہ وفاقی وزیر مذہبی امور سردار محمد یوسف نے قلم دان سنبھالنے کے بعد گذشتہ دور حکومت میں قائم ہونے والی علماء و مشائخ کونسل کو دوبارہ فعال بناتے ہوئے چار ماہ قبل اس کا تعارفی اجلاس طلب کیا تھا۔ دوسرے اجلاس میں بنیادی ارکان اسلام کی اہمیت اجاگر کرنے اور معاشرے میں اس کی ترویج سے متعلق اہم امور زیر بحث آئیں گے۔ اجلاس میں کونسل کی متفقہ سفارشات کو منظوری کے بعد وزارت مذہبی امور کے ذریعے متعلقہ محکموں سے بھیجا جائے گا۔
