راولپنڈی(نیوز رپورٹر) ڈائریکٹر جنرل راولپنڈی ڈویلپمنٹ اتھارٹی کنزہ مرتضیٰ نے اہم عہدیداروں کے ہمراہ راولپنڈی چیمبر آف کامرس اینڈ انڈسٹری (آر سی سی آئی) کے نمائندوں اور کاروباری برادری کے اہم ارکان کے ساتھ ایف ڈبلیو او کیمپ آفس میں رننگ روڈ پراجیکٹ کے لیے ایک اہم مشاورتی اجلاس کیا۔ اس اجلاس کا مقصد مختلف اسٹیک ہولڈرز کے ساتھ تعاون کو فروغ دینا اور ان سے قیمتی تجاویز حاصل کرنا تھا تاکہ راولپنڈی رننگ روڈ پراجیکٹ کی کامیاب تکمیل کو یقینی بنایا جا سکے۔ یہ منصوبہ جسے علاقے کے لیے ایک گیم چینجر کے طور پر دیکھا جا رہا ہے، ٹریفک کی بھیڑ بھاڑ کو کم کرنے، اقتصادی سرگرمیوں کو بڑھانے اور تجارت و کاروبار کے لیے جدید انفراسٹرکچر فراہم کرنے کے لیے ڈیزائن کیا گیا ہے۔ اجلاس کے دوران ڈی جی آر ڈی اے کنزہ مرتضیٰ نے منصوبے کی پیشرفت پر روشنی ڈالی اور اس کی تکمیل میں شفافیت اور شمولیت کی اہمیت پر زور دیا۔
انہوں نے کہا راولپنڈی رنگ روڈ صرف ایک انفراسٹرکچر پراجیکٹ نہیں ہے؛ یہ اس علاقے کی اقتصادی ترقی کے لیے ایک لائف لائن ہے۔ کاروباری برادری اور آر سی سی آئی کے ساتھ مشاورت ہمیں اس منصوبے کو ان لوگوں کی ضروریات سے ہم آہنگ کرنے میں مدد دیتی ہے جنہیں یہ خدمت فراہم کرے گا۔ آر سی سی آئی کے صدر عثمان شوکت و دیگر آرسی سی آئی ممبرز اور کاروباری برادری کے نمائندوں نے آر ڈی اے کے اسٹیک ہولڈرز کو شامل کرنے کے لیے اٹھائے گئے اقدامات کی تعریف کی۔ انہوں نے کاروبار دوست سہولتیں شامل کرنے کے حوالے سے تعمیری تجاویز پیش کیں.
جن میں مخصوص صنعتی زونز کا قیام، تجارتی علاقوں کے لیے بہتر رابطے اور سرمایہ کاری کو راغب کرنے کے لیے پالیسیاں شامل ہیں۔ ڈی جی آر ڈی اے کنزہ مرتضیٰ نے شرکاء کو یقین دہانی کرائی کہ ان کی تجاویز پر سنجیدگی سے غور کیا جائے گا اور اس عزم کو دہرایا کہ منصوبے کی تکمیل مقررہ وقت میں کی جائے گی، جبکہ اس کی معیار اور کارکردگی کو بھی اعلیٰ سطح پر برقرار رکھا جائے گا۔ اجلاس کا اختتام آر ڈی اے، آر سی سی آئی اور کاروباری برادری کے درمیان تعاون کے عزم کے ساتھ ہوا، تاکہ راولپنڈی رننگ روڈ منصوبہ خطے میں پائیدار ترقی اور اقتصادی خوشحالی کا سنگ میل ثابت ہو۔
