راولپنڈی(نیوز رپورٹر)پارکس اینڈ ہارٹیکلچر اتھارٹی راولپنڈی کی جانب سے شجرکاری مہم کا آغاز کر دیا گیا ہے، اس حوالے سے ڈی جی پی ایچ اے احمد حسن رانجھا کی خصوصی ہدایات پر 6th روڈ پر واقع ملیہ پارک میں ایک شجرکاری تقریب کا انعقاد کیا گیا.
تقریب “پلانٹ فار پاکستان” کے عنوان پر منعقد کی گئی،تقریب کی مہمانِ خصوصی ممبر قومی اسمبلی محترمہ طاہرہ اورنگزیب صاحبہ تھیں ان کے ساتھ ایم پی اے و پارلیمانی سیکرٹری محترمہ شازیہ رضوان،ممبرانِ صوبائی اسمبلی محترمہ زیب النسا اعوان اور محترمہ عاصمہ عباسی نے شجرکاری مہم میں شرکت کی.
محترمہ طاہرہ اورنگزیب سمیت دیگر خواتین نے پودا لگایا اور اس کے بعد شجرکاری کی اہمیت کو اجاگر کرنے کے لئے پی ایچ اے افسران و سٹاف سمیت آگاہی واک میں بھی شرکت کی،پارک میں موجود بچوں نے بھی پودے لگا کر شجرکاری مہم میں حصہ لیا.
بعد ازاں ملیہ پارک میں مفت پودے تقسیم کرنے کے کیمپ میں جا کر محترمہ طاہرہ اورنگزیب اور دیگر نے عوام میں مفت پودے تقسیم کئے.
اس موقع پر معزز مہمان ممبر قومی اسمبلی کا کہنا تھا کہ ماحولیات کو صحت مند بنانے کے لئے درخت لگانے کی بہت اہمیت ہے،ہمیں اپنے اپنے علاقوں ،شہروں ،گلی محلوں کو آلودگی سے اور موسمیاتی تبدیلیوں سے بچانے کے لئے شجرکاری کی اہمیت کو سمجھنا ہو گا.
انکا مزید کہنا تھا کہ خواتین پی ایچ اے کی شجرکاری مہم میں شانہ بشانہ حصہ لیں اور سرسبز راولپنڈی کے مشن میں اپنا حصہ ڈالیں اس موقع پر ملیہ پارک میں 105 پودے لگائے گئے اور 150 پودے عوام میں تقسیم کئے گئے.
