راولپنڈی (نیوز رپورٹر)پارکس اینڈ ہارٹیکلچر اتھارٹی راولپنڈی کی جانب سے شہر بھر کے پارکس اور گرین بیلٹس کی سجاوٹ، خوبصورتی اور عوام کو بہترین تفریحی سہولیات فراہم کرنے کے حوالے سے تمام تر وسائل بروئے کار لائے جا رہے ہیں،ڈی جی پی ایچ اے احمد حسن رانجھا کی خصوصی ہدایات پر پی ایچ اے کی جانب سے شہر کی مرکزی شاہراہ مری روڈ کے تمام سیکٹرز پر سجاوٹ اور موسمی پھولوں کی کاشت کا کام زور وشور سے جاری ہے،
مری روڈ کے سیکٹر موتی محل پر خوبصورت پلانٹرز کی تنصیب کا کام مکمل کر لیا گیا ہے،پلانٹرز میں رنگ برنگے موسمی پھول لگائے گئے ہیں،جو سڑک کنارے رکھے گئے ہیں.
پلانٹرز کی سجاوٹ راہگیروں کو ایک فرحت کا احساس دلاتی ہے،مری روڈ پر صدر سے لے کر فیض آباد تک رنگ برنگے موسمی پھولوں کی خوبصورت بہار دکھائی دیتی ہے،جو مرکزی شاہراہ کی دیدہ زیبی میں اضافہ کرتی ہے،
موتی محل پر رکھے پلانٹرز کی سجاوٹ،دل کو موہ لینے والے خوبصورت پھول اور سرسبز مناظر عوام کی توجہ کا مرکز بن گئے ہیں ، ڈی جی پی ایچ اے احمد حسن رانجھا کی خصوصی ہدایات پر مری روڈ کی خوبصورتی کو اپ لفٹ کرنے کے اقدامات کئے جا رہے ہیں.
اس کے علاوہ پی ایچ اے کا عملہ نہایت مستعدی سے ہارٹیکلچر کا کام اور پھول پودوں کی نگہداشت کا کام بھی سرانجام دے رہا ہے،ڈی جی پی ایچ اے احمد حسن رانجھا کا کہنا تھا کہ عوام کی سہولت اور تفریح کے لئے تمام تر ضروری اقدامات اٹھائے جا رہے ہیں،اس حوالے سے کسی قسم کی کوتاہی برداشت نہیں کی جائے گی،راولپنڈی کو خوبصورت اور سر سبز بنانے اور عوام کو ایک اچھا تفریحی ماحول فراہم کرنے کےلئے تمام ضروری اقدامات اٹھائے جا رہے ہیں.
