راولپنڈی (سٹاف رپورٹر ) ڈائریکٹر جنرل راولپنڈی ڈویلپمنٹ اتھارٹی کنزہ مرتضیٰ نے واضح کیا ہے کہ ہاؤسنگ سکیموں اور عمارتوں سے بقایا جات کی وصولی اتھارٹی کی اولین ترجیح ہے۔ انہوں نے ایڈیشنل ڈائریکٹر جنرل آر ڈی اے منصور احمد خان اور تمام متعلقہ ڈائریکٹوریٹس کو ہدایت کی ہے کہ وہ ریکوری کے عمل کو بروقت اور مؤثر بنانے کے لیے اپنی کوششیں تیز کریں۔ ڈی جی آرڈی اے نے اس کو اتھارٹی کے جاری آپریشنز کا ایک کلیدی فوکس ایریا قرار دیتے ہوئے محکمہ جات کے درمیان مربوط تعاون پر خاص زور دیا اور عملے کو ریکوری کے طریقہ کار کی سختی سے پابندی کی ہدایت کی۔
انہوں نے تمام متعلقہ امور میں شفافیت، کارکردگی اور جوابدہی کو اولین ترجیح قرار دیا۔ ڈائریکٹر جنرل نے کہا کہ آر ڈی اے کی مالی استحکام براہِ راست راولپنڈی کے شہریوں کو بہتر اور موثر خدمات فراہم کرنے کی صلاحیت سے منسلک ہے، اس لیے بقایا جات کی وصولی میں کسی قسم کی تاخیر یا غفلت برداشت نہیں کی جائے گی۔ آر ڈی اے اپنے فرائض کو مکمل احسن طریقے سے ادا کرنے اور وسائل کے مؤثر انتظام کے ذریعے پائیدار شہری ترقی کو یقینی بنانے کے لیے پرعزم ہے۔
