راولپنڈی(سٹاف رپورٹر ) ڈویژنل انٹیلی جنس کمیٹی کی ہدایات کے بعد راولپنڈی ڈویلپمنٹ اتھارٹی کی ٹاسک فورس غیر قانونی تعمیرات اور غیر قانونی ہاؤسنگ سکیموں کے خلاف آپریشن جاری رکھے ہوے ہے۔ ترجمان آر ڈی اے کے مطابق، آر ڈی اے انفورسمنٹ سکواڈ نے موضع اڈیالہ تحصیل و ضلع راولپنڈی میں پی آئی اے آفیسرز کوآپریٹو ہاؤسنگ سکیم کو نشانہ بناتے ہوئے ایک اہم آپریشن کیا ہے۔ آپریشن کے نتیجے میں سائٹ کے دفاتر کو سیل کر دیا گیا اور اس ہاؤسنگ سکیم کے روڈ انفراسٹرکچر کو مسمار کر دیا گیا۔
کریک ڈاؤن کی نگرانی ڈائریکٹر جنرل کنزہ مرتضیٰ نے کی، جنہوں نے دھوکہ دہی کے طریقوں سے نمٹنے اور شہریوں کو استحصال سے بچانے کے لیے اس طرح کی کارروائیاں جاری رکھنے کی ضرورت پر زور دیا۔ ڈی جی آر ڈی اے نے کہا کہ کمشنر راولپنڈی کی رہنمائی میں ہم غیر قانونی ہاؤسنگ سوسائٹیوں کے خاتمے کے لیے مضبوط انداز اپنانے کے لیے پرعزم ہیں۔ انہوں نے زور دے کر کہا کہ ہاؤسنگ سکیم مالکان کی جانب سے زمینوں پر ناجائز قبضوں سے متعلق عوامی شکایات کو سنجیدگی سے لیا جا رہا ہے اور زمینوں پر زبردستی قبضے میں ملوث افراد کے خلاف سخت کارروائی کی جائے گی۔
ڈی جی آرڈی اے نے شہریوں پر زور دیا کہ وہ کسی بھی خرید و فروخت سے قبل آرڈی اے کی ویب سائٹ www.rda.gop.pk پر منظور شدہ ہاؤسنگ اسکیموں کی فہرست ضرور چیک کریں تاکہ کسی ممکنہ نقصان سے بچا جا سکے۔ اس آپریشن میں سپرنٹنڈنٹ پلاننگ بلڈنگ و پلاننگ انسپکٹرز محمد طارق، عمران حسین اور دیگر اہم ٹیم اراکین شامل تھے، آپریشن تھانہ صدر بیرونی کے تعاون سے کیا گیا۔
