راولپنڈی (سٹاف رپورٹر) پارکس اینڈ ہارٹیکلچر اتھارٹی راولپنڈی شہر کو سرسبز و شاداب، خوبصورت بنانے اور شجرکاری کے فروغ کے لئے سرگرمِ عمل ہے،شہر بھر میں بیوٹیفیکیشن کے مختلف منصوبوں پر کام کے ساتھ ساتھ ڈی جی پی ایچ اے راولپنڈی احمد حسن رانجھا کی خصوصی ہدایات کی روشنی میں پی ایچ اے اپنی نرسریز میں متعدد اقسام کے پھولوں اور پودوں کی افزائش اور نگہداشت کے عمل کو بھی یقینی بنا رہی ہے،تاکہ پودوں کی افزائش اور دستیابی میں خود کفالت کو یقینی بنایا جائے اور شہر کو سرسبز بنانے میں مدد مل سکے،
پی ایچ اے راولپنڈی کی خیابان نرسری میں ایئر لیئرنگ کے طریقہ کار اور مختلف اقسام کے بیجوں کے استعمال سے عملے نے متعدد اقسام کے پودوں کی افزائش کو یقینی بنایا ہے،ان پودوں میں کچنار،پِلکن سمیت دیگر متعدد اقسام کے پودے شامل ہیں،بیجوں کے لگانے سے بھی پودوں کی اچھی نسل تیار کر لی گئی ہے،جو اب شہر کی خوبصورتی میں اضافے اور سرسبز ماحول کے فروغ کے لئے معاون ثابت ہو گی،اور پی ایچ اے پودوں کی دستیابی میں خود کفالت کو برقرار رکھ سکے گا،ایئرلیئرنگ کے عمل کو عام زبان میں گُٹی باندھنا کہا جاتا ہے،جس کے ذریعے پودے کی شاخ پر گُٹی باندھ دی جاتی ہے جس سے اسکی جڑیں نکل آتی ہیں اور افزائش کا عمل مکمل کر کے پھر پودا استعمال کے لئے تیار ہو جاتا ہے.
نرسریز میں تیار شدہ پودوں کو خیابان سمیت راولپنڈی کے مختلف علاقوں میں لگایا جائے گا جس سے شہر کی خوبصورتی میں اضافہ ہو گا اور سرسبز ماحول کو فروغ ملے گا،ڈی جی پی ایچ اے احمد حسن رانجھا کا کہنا تھا کہ پی ایچ اے راولپنڈی کی نرسریز میں ورکرز پھول پودوں کی نگہداشت اور افزائش کے عمل اور ہارٹیکلچر کے کام کو نہایت مہارت سے جاری رکھے ہوئے ہیں،نرسریز سے شہر کے پارکوں اور گرین بیلٹس پر پودوں کو لگانے کی ضرورت پوری کی جاتی ہے،پی ایچ اے پودوں کی دستیابی کے حوالے سے خود کفیل ہو چکا ہے،انھوں نے کہا کہ راولپنڈی شہر کو پنجاب حکومت کے وژن کے مطابق سرسبز بنائیں گے.
