راولپنڈی (سٹاف رپورٹر)پارکس اینڈ ہارٹیکلچر اتھارٹی راولپنڈی کی جانب سے ڈی جی پی ایچ اے احمد حسن رانجھا کی خصوصی ہدایات پر سیاحوں کی تفریحی سہولیات کو بہتر بنانے اور مری شہر کی خوبصورتی کو مزید نکھارنے کے حوالے سے بیوٹیفیکیشن کے خصوصی اقدامات کئے گئے ہیں،اس حوالے سے مختلف منصوبے مکمل کر لئے گئے ہیں،لوئر ٹوپہ پارک میں شاندار سجاوٹ اور ہارٹیکلچر کا کام سرانجام دیا گیا ہے،جس سے پارک کی خوبصورتی میں اضافہ ہوا ہے،اس کے ساتھ ساتھ 7 سٹنگ سپاٹس پر بھی دلکش سجاوٹ کا کام سرانجام دیا گیا ہے جو سیاحوں کی توجہ کا مرکز بنا ہوا ہے،پی ایچ اے راولپنڈی کی جانب سے اپر جھیکا گلی،ویو فورتھ روڈ،گورنمنٹ ہاوس روڈ پر خوبصورت پھولوں،پودوں سے شاندار سجاوٹ کی گئی ہے جو ملکہ کوہسار مری کے حسین نظاروں کو دوبالا کرتی ہے،اس کے علاوہ کلڈنہ میں سجاوٹ کے لئے جگہ جگہ رکھے گئے پلانٹرز بھی مری کی شان و شوکت میں اضافہ کر رہے ہیں،مری کے روڈوں کی گرین بیلٹس پر خوبصورت پھولوں کی بہار نظر آ رہی ہے،جس سے ایک دلفریب منظر دیکھنے کو ملتا ہے،دلکش پلانٹرز کی تنصیب، سجاوٹ،دیواروں پر خوبصورت ڈیزائن کی کشیدہ کاری کی گئی ہے،ہارٹیکلچر کے حوالے سے بھی شاندار اقدامات کئے گئے ہیں.
ڈائریکٹر جنرل پارکس اینڈ ہارٹیکلچر اتھارٹی (پی ایچ اے)راولپنڈی احمد حسن رانجھا نے مری شہر کی سجاوٹ اور پھولوں کی تزین وآرائش کےبارے میں متعلقہ عملے کو صفائی،سجاوٹ اور ہارٹیکلچر کے کام میں مزید نکھار لانے کے لئے خصوصی ہدایت بھی دیں، ڈائریکٹر جنرل پی ایچ اے راولپنڈی احمد حسن رانجھا نے مری میں سیاحوں اور مقامی عوام کے لئے شہر کے ماحول کو خوبصورت اور سرسبز بنانے کے لئے نظام مزید بہتر بنانے کی ہدایات دیتے ہوئے کہا کہ مری کو پُرفضا مقام کے طور پر برقرار رکھنے اور اسکو مزید خوبصورت بنانے کے لئے تمام وسائل بروئے کار لا رہے ہیں،عوام کو بہترین تفریح کی سہولیات کی فراہمی پی ایچ اے کی ذمہ داری ہے ، اس حوالے سے کسی قسم کی کوتاہی برداشت نہیں کی جائے گی .
انہوں نے عملے کو ہدایت کی کہ مری شہر کے تمام اہم پوائنٹس پر سرسبز پودوں اور رنگ برنگے پھولوں کی نگہداشت،کاشت اور سجاوٹ کے انتظامات کو مزید بہتر بنایا جائے،
احمد حسن رانجھا نے کہا کہ ملکہ کوہسار مری کو سرسبز بنانا،عوام کو بہترین تفریحی سہولیات کی فراہمی اور صاف ستھرا ماحول فراہم کرنا پی ایچ اے کا عزم ہے، اس حوالے سے عوام کے تعاون کے بھی خواہاں ہیں،مری شہر میں بیوٹیفیکیشن کے حوالے سے مزید منصوبوں پر بھی کام جاری ہے.
