راولپنڈی (کرائم رپورٹر)تھانہ پیرودھائی ،غیرت کے نام پر قتل کے حوالے سے سی پی او سید خالد ہمدانی کا بیان۔تفصیلات کے مطابق پیرودھائی غیرت کے نام پر قتل کے حوالے سے سی پی او سید خالد ہمدانی نے بیان دیتے ہوئے کہا کہ ابتدائی طور پر ملزمان نے واقعہ کو اغواء کی شکل دینے کی کوشش کی،تفتیش آگے بڑھی تو اطلاعات ملیں کی لڑکی کو قتل کر کے نعش خاموشی سے دفنا دی گئی ہے،ملزمان نے قبر کے نشان بھی مٹا دئیے،ایسے معاملات کو ہم بہت سنجیدگی سے لیتے ہیں .
پولیس نے خصوصی ٹیم بنائی قبر تلاش کر کے سیکورٹی لگائی گئی، سب سے اہم بات یہ ہے کہ مقدمہ کی مدعیت اب پولیس اور سٹیٹ کی ہے،مقدمہ میں دفعہ 311 ت پ شامل کی گئی ہے اس مقدمہ میں صلح نہیں ہو سکتی،مقدمہ میں کچھ لوگ گرفتار ہیں،قبرستان کمیٹی کا چیئرمین اور گورکن گرفتار افراد میں شامل ہیں،واقعہ کی پوری پکچر پولیس کے سامنے ہے،تمام ملوث افراد کی شناخت کی جا چکی، معاملہ کی تہہ تک پہنچ چکے ہیں،یقین دلاتے ہیں کہ اس جرم میں ملوث کوئی شخص قانون سے نہیں بچ سکے گا، قبر کشائی کے قانونی پراسس کا آغاز ہو چکا ہے.
یقینی بنایا جائے گا کہ ہر زاویہ سے تفتیش کرتے ہوئے مکمل تفصیلات عدالت کے سامنے لائی جائیں اور ملزمان کو سزا دلوائی جائے،سی پی او سید خالد ہمدانی کامزید کہنا تھا کہ قانونی تقاضوں کی تکمیل کے بعد تمام تفصیلات میڈیا کے ذریعے قوم تک پہنچائی جائیں گی۔
