راولپنڈی (سٹاف رپورٹر)پارکس اینڈ ہارٹیکلچر اتھارٹی راولپنڈی کی جانب سے شہر بھر کے پارکس اور گرین بیلٹس کی سجاوٹ، خوبصورتی اور عوام کو بہترین تفریحی اور سیکیورٹی کی سہولیات فراہم کرنے کے حوالے سے تمام تر وسائل بروئے کار لائے جا رہے ہیں ڈی جی پی ایچ اے احمد حسن رانجھا کی خصوصی ہدایات پر پی ایچ اے شہر بھر کے پارکوں،اہم شاہراہوں کی گرین بیلٹس اور چوک چوراہوں کی تزین و آرائش کا کام سر انجام دے رہا ہے،
اس کے ساتھ ساتھ پی ایچ اے کی مختلف نرسریز میں پودوں اور خوش رنگ پھولوں کی نگہداشت کا کام بھی باقاعدگی سے جاری ہے،پی ایچ اے راولپنڈی کا عملہ شہر میں سرسبز ماحول کے فروغ کے لئے تمام تر ضروری اقدامات پر عمل پیرا ہے.
شہر میں ہر طرف رنگ برنگے پھول پودوں کی بہار کا سا سماں دکھائی دیتا ہے،جس سے راولپنڈی شہر کی خوبصورتی اور سرسبز ماحول میں اضافہ ہوا ہے،پارکوں اور گرین بیلٹس کی سجاوٹ،دل کو موہ لینے والے خوبصورت پھول اور سرسبز مناظر عوام کی توجہ کا مرکز ہیں،شہر میں اپ گریڈیشن اور بیوٹیفیکیشن کے متعدد منصوبے جاری ہیں،پی ایچ اے پنجاب حکومت کے وژن کے مطابق شہریوں کو بہترین تفریحی سہولیات فراہم کرنے میں پیش پیش ہے،
پی ایچ اے کی جانب سے ڈی جی پی ایچ اے احمد حسن رانجھا کی خصوصی ہدایات پر روزانہ کی بنیاد پر شہر کے پارکوں اور گرین بیلٹس پر پودوں پھولوں کی دیکھ بھال کا کام سرانجام دیا جا رہا ہے، پارکوں میں بہترین سیکیورٹی کے انتظامات بھی کئے گئے ہیں،تاکہ پارکوں میں تفریح کے لئے آنے والے اپنے آپ کو محفوظ تصور کر سکیں،اس کے علاوہ پی ایچ اے کا عملہ نہایت مستعدی سے ہارٹیکلچر کا کام اور پھول پودوں کی نگہداشت کا کام بھی سرانجام دے رہا ہے.
ڈی جی پی ایچ اے احمد حسن رانجھا کا کہنا تھا کہ عوام کی سہولت اور تفریح کے لئے تمام تر ضروری اقدامات اٹھائے جا رہے ہیں،اس حوالے سے کسی قسم کی کوتاہی برداشت نہیں کی جائے گی،راولپنڈی کو خوبصورت اور سر سبز بنانے اور عوام کو ایک اچھا تفریحی ماحول فراہم کرنے کےلئے کوشاں ہیں،ڈی جی پی ایچ اے احمد حسن رانجھا کا کہنا تھا کہ راولپنڈی شہر میں بھرپور شجرکاری مہم بھی زور و شور سے جاری ہے جس سے ہم ماحولیاتی آلودگی کو کم کر سکتے ہیں.
