سیالکوٹ(کرائم رپورٹر)ایف آئی اے امیگریشن نے سیالکوٹ ایئرپورٹ پر کارروائی کرتے ہوئے جعلی دستاویزات پر بیرون ملک جانے کی کوشش ناکام بنا دی۔ کارروائی کے دوران ایک مسافر کو آف لوڈ کر دیا گیا ایف آئی اے حکام کے مطابق، مسافر کی شناخت عمر فاروق کے نام سے ہوئی ہے، جو فلائٹ نمبر G9553 کے ذریعے یونان روانہ ہونے کی کوشش کر رہا تھا۔ دورانِ امیگریشن چیکنگ، مسافر کی جانب سے پیش کیا جانے والا یونان کا ریزیڈنٹ کارڈ جعلی پایا گیا۔
ابتدائی تحقیقات کے مطابق، عمر فاروق کا تعلق جہلم سے ہے، اور اس نے مذکورہ جعلی کارڈ دینہ کے رہائشی ایک ایجنٹ سے حاصل کیا تھا۔ ایجنٹ نے اس جعلی دستاویز کے عوض 13 لاکھ روپے ہتھیائے ایف آئی اے نے مسافر کو مزید قانونی کارروائی اور ایجنٹ کی نشاندہی کے لیے اینٹی ہیومن ٹریفکنگ سرکل گجرات کے حوالے کر دیا ہے ایف آئی اے نے شہریوں سے اپیل کی ہے کہ وہ اپنے قیمتی ذاتی دستاویزات کسی غیر متعلقہ شخص یا ایجنٹ کے سپرد نہ کریں، اور ویزا یا امیگریشن سے متعلق معاملات میں ہمیشہ متعلقہ ملک کے سفارتخانے یا ایمبیسی سے رجوع کریں۔
