راولپنڈی ( سٹاف رپورٹر)پبلک سیکٹر مینجمنٹ اینڈ گورننس ٹریننگ کورس کے حوالے سے افسران نے راولپنڈی ڈویلپمنٹ اتھارٹی کا دورہ کیا، جس کا مقصد اتھارٹی کے عملی امور کا مشاہدہ کرنا تھا۔ یہ تربیتی کورس پنجاب انسٹیٹیوٹ آف مینجمنٹ اینڈ پروفیشنل ڈیویلپمنٹ کے زیر اہتمام منعقد کیا گیا۔ اس دورے میں پنجاب بھر کے مختلف اضلاع سے تعلق رکھنے والے 43 افسران نے شرکت کی، جن میں اسسٹنٹ ڈائریکٹرز، تحصیل پاپولیشن ویلفیئر آفیسرز، ڈیموگرافرز، ڈپٹی ڈسٹرکٹ اکاؤنٹ آفیسرز، اسسٹنٹ ڈسٹرکٹ اٹارنیز اور دیگر شامل تھے۔
اس موقع پر ایڈیشنل ڈائریکٹر جنرل آر ڈی اے منصور احمد خان نے شرکاء کو آر ڈی اے کی انتظامی ساخت، بنیادی افعال اور درپیش چیلنجز کے بارے میں جامع بریفنگ دی۔ انہوں نے ادارے کی تاریخی، جاری اور آئندہ ترقیاتی منصوبوں بشمول رنگ روڈ پروجیکٹ، نالہ لئی پروجیکٹ اور دیگر مجوزہ اقدامات پر بھی تفصیل سے روشنی ڈالی۔ انہوں نے کہا کہ اس نوعیت کے کورسز سرکاری افسران کے لیے نہایت مفید ہیں، کیونکہ یہ ترقیاتی اداروں کے عملی ڈھانچے کو سمجھنے اور مؤثر طرز حکمرانی کے لیے عملی بصیرت فراہم کرتے ہیں۔
دورے کے موقع پر آر ڈی اے کے دیگر اہم افسران میں ڈائریکٹر ایڈمن اینڈ فنانس قاضی صہیب احمد اور ڈپٹی ڈائریکٹر ایڈمن افتخار علی بھی موجود تھے۔ یہ دورہ شرکاء کے لیے ایک معلوماتی تجربہ ثابت ہوا، جس نے شہری ترقی اور عوامی خدمت کی فراہمی میں مربوط منصوبہ بندی اور مؤثر حکمرانی کی اہمیت کو اجاگر کیا۔
